Erkin Vohidov ijodi

☀ОНА ТИЛИМ ЎЛМАЙДИ

Нотиқ деди: 
“Тақдир шул, 
Бу жаҳоний ирода. 
Тиллар йўқолур буткул, 
Бир тил қолур дунёда”. 

“Эй воиз, пастга тушгин, 
Бу гап чиқди қаердан!” 
Навоий билан Пушкин 
Туриб келди қабрдан.  

Ким дарғазаб, 
Ким ҳайрон, 
Чиқиб келдилар қатор: 
Данте, Шиллер ва Байрон, 
Фирдавсий, Бальзак, Тагор.  

“Ваъзингни қўй, биродар, 
Сен айтганинг бўлмайди”. 
Барча деди баробар: 
“Она тилим ўлмайди”.  

– Ҳей, бу қандай ақида! – 
Қўлида табаррук жом, 
Гўзал форсий ҳақида 
Рубоий айтди Хайём.  

Эҳтиросли, оташдил 
Беранже сўрди нолон: 
– Наҳотки, фаранги тил 
Йўқолгуси бир замон!  

Неруда, Лорка турди 
Сервантеснинг ёнига: 
– Ким қасд этиб тиғ урди 
Она тилим жонига!  

Фузулий ёнди: 
– Озар 
Тили гулдек сўлмайди. 
Барча деди баробар: 
“Она тилим ўлмайди”.  

Камалакдек ранго-ранг 
Бўлсин деб санъат, тиллар, 
Асрларча қилдик жанг, 
Армон қилдик минг йиллар. 

Беқадр бўлса, наҳот, 
Тиллардаги тароват! 
Йўқолди бу кун, ҳайҳот, 
Қабрларда ҳаловат! 

“Фауст” ёнди гуриллаб, 
“Хамса” ўтга туташди. 
Бир садо жаҳон бўйлаб
Таралди, тоғлар ошди. 

Бу садо янграр ҳамон,
Сира адо бўлмайди.
Олам айтар: 
Ҳеч қачон 
Она тилим ўлмайди! 

✍  Ўзбекистон Қаҳрамони, Ўзбекистон халқ шоири Эркин Воҳидов, 1976 йил

👇👇👇  
🌐 www.facebook.com/evohidov  
🌐https://t.me/erkinvohidovijodi  
🌐 www.erkinvohidov.com

🕌Жумадан қолган одам

Бу сизга бир ҳикоя:
Чорак аср муқаддам
Ўсал ётар эди чол,
Сўнар эди мисли шам.
Узоқ-яқин авлодлар
Атрофида бўлиб жам
Видо айтар эдилар,
Қадлар эгик, кўзлар нам.

(Давоми)👇

https://telegra.ph/ZHumadan-%D2%9Bolgan-odam-08-13

https://t.me/Erkin_Vohidov

💫 ЭЛ НЕТИБ ТОПҒАЙ МЕНИ... 

(Навоий ғазалига мухаммас)

Кўнглим айтур севги домига асир тайёраман,
Дер кўзим ҳижрон туни зор йиғламоқдин қораман,
Жон дегай, ўт ораман, тан айтадир,  минг пораман, 
То муҳаббат дашти бепоёнида овораман,
Ҳар балият келса ишқ ошубидин бечораман.

Ул хазон фаслидаги саргашта бир япроқ манам,
Айрилибдурман чамандан, масканим дашти адам,
Изламанг ҳаргиз нишоним, топмагайсиз зарра ҳам,
Эл нетиб топғай мениким, мен ўзимни топманам,
Бўйлаким ишқу жунун саҳросида овораман.

Карбало даштида кўрган оҳулар бирлан мани,
Англади Мажнун билан бир жон мани, бир тан мани.
Ёнди жон, бир лайливашнинг дарди куйдирган мани, 
Оҳ дуди ичра бир учқун каби кўрган мани
Билдиким, ҳижрон тунига кавкаби сайёраман.

Қошларинг ҳижронида ёйдек эгилсам не ажаб,
Ғунча лаълинг ишқида бағримни тилсам не ажаб,
Шамъи ҳуснинг шавқида ўтга ёқилсам не ажаб,
Кеча ўртансам, саҳар фарёд қилсам не ажаб,
Ишқ аро парвонаю булбулга мен ҳамкораман.

Хўблар васли ғанимат,  хизматини айлади хўб,
Нури дийданг шамъ этиб тут, қоматингни айла чўб,
Борида қадрига ет, кетганда тупроғини ўп,
Эй Навоий, борди деб аҳбоб таъзир этма кўп,
Ит каби мен эргашиб ул карвонга бораман. 

✍ Ўзбекистон Қаҳрамони, Ўзбекистон халқ шоири Эркин Воҳидов, 1995 йил

👇👇👇
🌐 www.facebook.com/evohidov
🌐https://t.me/erkinvohidovijodi
🌐 www.erkinvohidov.uz

#Erkin_Vohidov_nomidagi_ijod_maktabi

⚡️O‘zbek adabiyotining buyuk namoyandasi, xalqimizning ardoqli farzandi, O‘zbekiston Qahramoni va xalq shoiri Erkin Vohidov tavalludining 90 yilligi mamlakatimiz bo‘ylab katta shukuh bilan nishonlanmoqda.

💬Shoir nomi bilan ataluvchi Ijod maktabida tashkil etilgan "TO QUYOSH SOCHGAYKI NUR" nomli adabiy-badiiy tadbirdan fotolar.

🟦Erkin Vohidov nomidagi ijod maktabi Matbuot xizmati

🌐Bizning sahifalarimiz👇

🚀Telegram 🔵Facebook
▶️YouTube 📷Instagram

ЎЗБЕГИМ
                         Қасида

Тарихингдир минг асрлар
Ичра пинҳон, ўзбегим,
Сенга тенгдош Помиру
Оқсоч Тиёншон, ўзбегим.

Сўйласин Афросиёбу
Сўйласин Ўрхун хати,
Кўҳна тарих шодасида
Битта маржон, ўзбегим.

Ал Беруний, Ал Хоразмий,
Ал Фороб авлодидан,
Асли насли балки Ўзлуқ,
Балки Тархон, ўзбегим.

Ўтдилар шўрлик бошингдан
Ўйнатиб шамширларин
Неча ҳоқон, неча султон,
Неча минг хон, ўзбегим.

Тоғларинг тегрангда гўё
Бўғма аждар бўлди-ю,
Икки дарё — икки чашминг,
Чашми гирён, ўзбегим.

Қайсари Рум найзасидан
Бағрида доғ узра доғ,
Чингизу Боту тиғига
Кўкси қалқон, ўзбегим.

Ёғди тўрт ёндин асрлар
Бошингга тийри камон,
Умри қурбон, мулки торож,
Юрти вайрон, ўзбегим.

Давр зулмига ва лекин
Бир умр бош эгмадинг,
Сен — Муқанна, сарбадор — сен,
Эрксевар қон, ўзбегим.

Сен на зардушт, сен на буддий,
Сенга на оташ, на санам,
Одамийлик дини бирла
Тоза имон, ўзбегим.

Маърифатнинг шуъласига
Талпиниб зулмат аро,
Кўзларингдан оқди тунлар
Кавкабистон, ўзбегим.

Тузди-ю Мирзо Улуғбек
Кўрагоний жадвалин,
Сирли осмон тоқига илк —
Қўйди нарвон ўзбегим.

Мир Алишер наърасига
Акс-садо берди жаҳон,
Шеърият мулкида бўлди
Шоҳу султон ўзбегим.

Илму шеърда шоҳу султон,
Лек тақдирига қул,
Ўз элида чекди ғурбат,
Зору нолон ўзбегим.

Мирза Бобур — сен, фиғонинг
Солди олам узра ўт,
Шоҳ Машраб қони сенда
Урди туғён, ўзбегим.

Шеъриятнинг гулшанида
Сўлди маҳзун Нодира,
Сийм танни ювди кўз ёш,
Кўмди армон, ўзбегим.

Йиғлади фурқатда Фурқат
Ҳам муқимликда Муқийм,
Нолишингдан Ҳинду Афғон
Қилди афғон, ўзбегим.

Тарихинг битмакка, халким,
Мингта Фирдавсий керак,
Чунки бир бор чеккан оҳинг
Мингта достон, ўзбегим.

Ортда колди кўҳна тарих,
Ортда қолди дард, ситам,
Кетди ваҳминг, битди заҳминг,
Топди дармон, ўзбегим.

Бўлди осмонинг чароғон
Толе хуршиди билан,
Бўлди асрий тийра шоминг
Шуълаафшон, ўзбегим.

Мен Ватанни боғ деб айтсам,
Сенсан унда битта гул.
Мен Ватанни кўз деб айтсам,
Битта мужгон ўзбегим.

Фахр этарман, она халқим,
Кўкрагимни тоғ қилиб,
Кўкрагида тоғ кўтарган
Танти деҳқон ўзбегим.

Ўзбегим деб кенг жаҳонга
Не учун мадҳ этмайин!
Ўзлигим билмоққа даврим
Берди имкон, ўзбегим.

Мен буюк юрт ўғлидурман,
Мен башар фарзандиман,
Лекин аввал сенга бўлсам
Содиқ ўғлон, ўзбегим.

Менга Пушкин бир жаҳону
Менга Байрон бир жаҳон,
Лек Навоийдек бобом бор,
Кўксим осмон, ўзбегим.

Қайга бормай, бошда дўппим,
Ғоз юрарман гердайиб,
Олам узра номи кетган
Ўзбекистон, ўзбегим.

Бу қасидам сенга, халқим,
Оқ суту туз ҳурмати,
Эркин ўғлингман, қабул эт,
Ўзбегим, жон ўзбегим.

Ўзбекистон Қаҳрамони
Ўзбекистон халқ шоири
Эркин Воҳидов, 1968 йил

👇👇👇
🌐 http://www.facebook.com/evohidov
🌐
🌐 http://www.erkinvohidov.uz/

☀️ ВАТАНДИН ЯХШИ  ЁР  БЎЛМАС

(Қозоқ шоири Жумакент Нажмиддинов ғазалига
мухаммас)

Жаҳонда мен туғилган
            Ўлкадек
ҳеч бир диёр бўлмас,
Бу янглиғ боғу гулшан
            Ҳам бу янглиғ гулузор бўлмас,

Ватан севмакдин ортиқ
            Менга оламда шиор бўлмас.
Ватан ишқида ёнган қалб,
            Билингки,
асти хор бўлмас,
Ватан севган муродига
            Етур, ҳеч дилда зор бўлмас.

Саодатга макондир
            Қай
чаманга сен қадам қўйсанг,
Ўзингни бахтли бил юртда
            Яшашнинг завқини туйсанг,
Чин одамсан, чин ўғлонсан
            Юракдан
элни чин суйсанг,
Ватан севмоқ саодатдир,
            Агар наслингга сен куйсанг,
Ватанни севмаган инсон
            Жаҳонда
бахтиёр бўлмас.

Тўйиб боқгил бу юрт ҳуснигаким,
            Кўнглингни
чоғ этгин,
Бу элнинг ўғлиман, деб
            Қил
ғурур, кўксингни тоғ этгин.
Ватан ҳар зарра тупроғин
            Кўзингга сен қароғ этгин,
Боболар маскан этган
            Бу
азиз тупроқни боғ этгин,
Ярашгай ифтихор этсангки,
            Ортиқ ифтихор бўлмас.

Зулоли таъмини топмам
            Сира
болу шакарларда.
Ватан ёди эрур қалбимда
            Бўлсам мен сафарларда,
Жамолига тўёлмасман
            Кезиб
қишлоқ, шаҳарларда,
Қизил гул баргида булбул
            Каби сайраб саҳарларда,
Яна шоир қилур такрор,
            Ватандин
яхши ёр бўлмас.

✍ Ўзбекистон Қаҳрамони, Ўзбекистон халқ шоири  Эркин Воҳидов, 1968 йил

👇👇👇
🌐 http://www.facebook.com/evohidov
🌐
🌐 http://www.erkinvohidov.uz/

🇺🇿 ЎЗБЕКИСТОН

Фахрия

Юртим,
Сени яна олдим қаламга
Тўйинг,
шодиёнанг баҳона бўлиб.
Яна келиб қўндинг тонгги мисрамга
Фалак нисор
этган дурдона бўлиб.
Иқбол пешонамга битган ошёним –
Ўзбекистоним.


Толеим бор экан,
Сенга
ҳамнафас,
Оташин қуёшинг билан йўғрилдим.
Юз йил
аввал эмас, юз йил сўнг эмас,
Туғёнли
асрда сенда туғилдим.
Гуллар
сочдинг мен илк босган қадамга
Бағринг
менга нурли кошона бўлиб.
Жаҳон ичра
менинг тенгсиз жаҳоним –
Ўзбекистоним.


Мақсад манзилида довон ошган дам
Йўлчи ҳам
бир тўхтаб олгандек нафас,
Марзагача етиб борган деҳқон ҳам
Ортга боқиб
бир зум қилгандек ҳавас,
Эллик баҳор
кўриб ҳаёт боғида
Умр
камолига қўл чўзиб инсон,
Олтин
дарвозани чертган чоғида
Сарҳисоб
қилади умрин бегумон.
Босиб ўтган
йўли шунда одамга
Туюлади
минг бир поғона бўлиб.
Минг бир
довон ошган алп паҳлавоним –
Ўзбекистоним.


Асли эллик эмас, эллик минг ёшинг,
Кечмишинг
тарихлар нариёғида.
Тўмарисдек она Кайхисрав бошин
Қон тўла
саночга солган чоғида,
Спитамен
камон тутиб дастида
Мароқандни
сақлаб турганда узоқ,
Ёвни
адаштириб ўлим даштида
Кўкрак очиб
қаҳ-қаҳ урганда Широқ,
Ҳали ўзбек
эмас, лекин оламга
Машҳур
эдинг соқу суғд она бўлиб.
Искандарни
мажруҳ этган камоним –
Ўзбекистоним.


Ваҳшат водийсида кечди асрлар
Алжабр
устодин туққунча еринг.
Илминг юксалгунча Беруний қадар,
То Алишер
қадар етгунча шеъринг,
Ҳайратга
солгунча фан оламини
Фарғоний
чиқарган аниқ ҳисоблар...
Тебранса не
ажаб Тошкент замини,
Бу ерга
кўмилган миллиард китоблар.
Фарангу
ҳинду чин, ироқ, ажамга
Таралдинг
Ал-қонун, Сайдона бўлиб.
Буюклар тан
берган буюк достоним –
Ўзбекистоним.


Минг бора тикландинг, минг бор қуладинг,
Ёвлар
қамчисидан чекканда озор –
Алпомиш сингари ўғлон тиладинг,
Тиладинг
Гўрўғли сингари сардор.
Сен ҳам
гуллар териб умид боғидан
Толе
орзусида туздинг алёрлар.
Аммо бўталаринг
қўнғироғидан
Чўлларда
тўкилиб қолди оҳ-зорлар.
Умринг эгиз
бўлди андуҳ-аламга
Орзуларинг
бари афсона бўлиб.
Барчиннинг
кўксида қолган армоним –
Ўзбекистоним.


Замин дардича бор бир аёл дарди,
Ойнинг доғи
балки унинг доғидан.
Фарёд олов бўлса олам ёнарди
Шарқлик
жувонларнинг чеккан оҳидан.
Зебунисо
ўтди танҳо ва маҳзун
Бошида ўт
бўлиб малика тожи.
Тун бўлиб
ёйилар Қўқонда ҳар кун
Нодирабегимнинг
қирқилган сочи.
Аёл!
Тўрт
деворда кўмилдинг ғамга,
Ғазалларда
фақат жонона бўлиб.
Барнодек,
Анбардек дили сўзоним –
Ўзбекистоним.

Ҳали сокин
туман чулғаб бағрини
Ғафлат
уйқусида ётарди олам,
Умид
қаламида «Қуёш шаҳри»ни
Ҳали
ёзмаганди Кампанелла ҳам.
Нажот кўзи
билан мағрибга боқиб,
Кўҳна
Хоразмдан йўл олган карвон
Ёвмут
саҳросида ойлар улоқиб
Масков
тупроғига етганда омон,
Ўзбеклар
тўқиган шоҳи, гиламга
Боққанда
зарифлар ҳайрона бўлиб,
Дўстлик
ипак йўли очган карвоним –
Ўзбекистоним.

Дарвозангни
очдинг маърифат, фанга,
Сенга ошно
бўлди Пушкин каби зот.
Лекин бахту
иқбол кулмади санга,
Ҳали олис
эди сен кутган нажот.
Эрк дея
аталган табаррук шамга
Интилдинг
бир умр парвона бўлиб.
Парвонадек
куйиб ўртанган жоним –
Ўзбекистоним.
Дардингни
куйлади анҳорларингда
Ғижирлаб
айланган кўҳна чархпалак,
Санъатинг
мунаққаш деворларингда,
Лекин
ободлигинг бўлди Ҳапалак.
Париларинг
тутқун бўлиб ҳарамга,
Улуғ
шоирларинг девона бўлиб,
Тақдир
саҳросида зору сарсоним –
Ўзбекистоним...

Кўп элларни
кездим, кўп юртлар кўрдим,
Бир-биридан
гўзал, бир-биридан соз.
Лекин
Шарқда машъал чароғон юртим
Оламда
тенги йўқ, ўлкадур мумтоз.
Бунда
дўстлик куйин айтур ҳар чечак,
Бунда
бахтни қилур ҳар булбул наво.
Диллардаги
азал башарий тилак –
Буюк
биродарлик гулшани аро
Осиёхон
деган сулув санамга
Олтин сепу
атлас сўзона бўлиб
Кулиб
турган, ёруғ, мунис маконим –
Ўзбекистоним.

Йироқдан
эшитиб сурнай овозин
Кўчага
югурган бола сингари,
Мен ҳам
қўлга олиб сибизға созим
Тўйингга
шошарман элдан илгари.
Тилак шу –
қўшиғим катта байрамга
Етиб борса
кичик тўёна бўлиб.
Менинг ҳам
қолмасди дилда армоним,
Ўлкам,
онажоним, юрагим, жоним –
Ўзбекистоним.

✍ Ўзбекистон Қаҳрамони, Ўзбекистон халқ шоири  Эркин Воҳидов, 1974 йил

👇👇👇
🌐 http://www.facebook.com/evohidov
🌐
🌐 http://www.erkinvohidov.uz/

#Erkin_Vohidov_nomidagi_ijod_maktabi
#2025_2026_óquv_yili_bitiruvchilarimizdan_100_foizlik_natija

☄️Ixtisoslashtirilgan taʼlim muassasalari agentligi tizimidagi Erkin Vohidov nomidagi ijod maktabining 2025–2026 o‘quv yilida 35 nafar bitiruvchisining barchasi OTM talabasi bo‘ldi!

🔴Bitiruvchilarimizning o‘rtacha natijasi — 186,1 ball!

🗣Shundan:

📣26 nafar o‘quvchi — davlat granti asosida;
🔈9 nafar o‘quvchi — to‘lov-kontrakt asosida talabalik baxtiga muyassar bo'lishdi.

✨Bitiruvchilarimiz quyidagi nufuzli oliy ta’lim muassasalariga qabul qilindi:

✅O‘zbekiston davlat jahon tillari universiteti;
✅Toshkent davlat sharqshunoslik universiteti;
✅Jahon tillari universiteti;
✅O‘zbekiston Milliy universiteti;
✅O'zbekiston milliy pedagogika universiteti;
✅Toshkent davlat yuridik universiteti;
✅Toshkent davlat iqtisodiyot universiteti;
✅O‘zbekiston jurnalistika va ommaviy kommunikatsiyalar universiteti;
✅“Cyber university” davlat universiteti;
✅Farg‘ona davlat pedagogika universiteti;
✅Andijon davlat tillari universiteti;
✅Namangan davlat universiteti.

✔️Bu natija — o‘quvchilarning bilimga intilishi, ustozlarning fidokorona mehnati va ota-onalarning qo‘llab-quvvatlashi samarasidir!

🎓Barcha bitiruvchilarimizni talabalik baxti bilan muborakbod etamiz!

📚Ushbu natija uchun maktab ma'muriyati hamda pedagog o'qituvchilar jamoasiga minnatdorchilik bildiramiz!

📹Erkin Vohidov nomidagi ijod maktabi Matbuot xizmati

🌐Bizning sahifalarimiz👇

🚀 https://t.me/erkinvohidovmaktabi 🔵 https://www.facebook.com/profile.php?id=100078007902349&locale=ru_RU
▶ https://www.youtube.com/watch?v=sqyfVXqjD3E 📷 https://www.instagram.com/evohidov_ijodmaktabi?igsh=MWhpb3ZwaDhhMmVqMw==&utm_source=qr