HaksengUz

Koreyada axborot havfsizligi bo'yicha ishga kirmoqchi bo'lganlar bormi?

Sizlar uchun HaksengUz Jobs yopiq kanalida yangi ish e'lonlari joylandi! Kirib ko'rib ariza topshirishingiz mumkin.

HaksengUz Jobs: https://t.me/c/4437274671/33

"U mening ma’lumotlarimni biladi-ku!”

⌨️ Firibgarlar ko‘pincha sizning ismingiz, telefon raqamingiz yoki boshqa shaxsiy ma’lumotlaringizni oldindan bilib olib, o‘zlarini haqiqiy tashkilot xodimi sifatida tanishtirishadi. Lekin bu ma’lumotlari ularning haqiqiy xodim ekanini isbotlamaydi.

💻 Shaxsiy ma’lumotlarning ayrim qismlari ochiq manbalar, ijtimoiy tarmoqlar yoki turli bazalar orqali tarqalib ketgan bo‘lishi odatiy holga aylangan.

👉 Shu bois quyidagilarni unutmang:

⏺ «Ismimni va raqamimni bilyapti, demak ishonchli» degan xulosaga shoshilmang.
⏺ Suhbatdoshning kimligini u keltirgan ma’lumotlar asosida emas, balki rasmiy kanalga qo‘ng‘iroq qilish orqali aniqlang.

📌 Yangi bino ish boshlaydigan sana: 2026-yil 19-oktabr, dushanba.

📌 Yangi manzil: Seul shahri, Songpa-gu, Jeongui-ro 55 (서울시 송파구 정의로 55).

Janubiy Koreyadagi vatandoshlar diqqatiga: O‘zbekiston kelajagiga o‘z hissangizni qo‘shing!

Siz Janubiy Koreyada faoliyat yuritayotgan yetakchi mutaxassis, olim, IT-ekspert yoki innovatsion loyiha asoschisimiz? O‘z tajribangiz va ilg‘or g‘oyalaringizni mamlakatimiz rivojiga tatbiq etishni xohlaysizmi?

Joriy yilning 10-oktabr kuni O‘zbekiston Respublikasining Koreyadagi Elchixonasida O‘zbekistondan tashrif buyurgan nufuzli delegatsiya vakillari bilan ochiq muloqot bo‘lib o‘tadi.

💡 Asosiy yo‘nalishlar:
• Sun’iy intellekt va raqamli texnologiyalar
• Ta’lim va fan
• Tadbirkorlik va startaplar
• FinTech
• Tibbiyot
• Muhandislik
• Raqamli transformatsiya

🤝 Uchrashuv sizga nima beradi?
Siz o‘z loyiha va tashabbuslaringizni qisqa taqdimot shaklida namoyish etish hamda ularni Koreya hamkorlari ko‘magida O‘zbekistonda tatbiq qilish yo‘llarini bevosita mutasaddilar bilan muhokama qilish imkoniyatiga ega bo‘lasiz. Uchrashuv yakunida eng istiqbolli tashabbuslar umumlashtirilib, manfaatdor davlat organlari va tashkilotlari bilan birga amaliy qadamlar belgilanadi.

📍 Tadbir tafsilotlari:
🗓 Sana: 10-oktabr
⏰ Vaqt: 11:00
🏢 Manzil: O‘zbekiston Respublikasining Koreya Respublikasidagi Elchixonasi
👥 Ishtirokchilar soni: 30 nafar (joylar cheklangan!)
🔗 Ro‘yxatdan o‘tish: Havola ustiga bosing

P.S. Samimiy muloqot davomida barcha ishtirokchilar uchun delegatsiya tomonidan osh dasturxoni yoziladi!

O‘zbekiston taraqqiyotiga befarq bo‘lmagan barcha faol yurtdoshlarimizni kutib qolamiz! Loyihangiz bilan davlat rivojiga munosib hissa qo‘shing!
Batafsil ma'lumot va manba.

Bir necha oy oldin universitet sabab TOPIK va KIIP imtihonlarini topshirishimga to‘g‘ri keldi. Har safar til imtihonlariga kirsam, o‘zbek do‘stlarimizni juda kam ko‘raman. Lekin Vetnam, Tailand kabi davlatlardan kelganlar juda ko‘p. KIIP darslarida ham o‘zbek talabalaridan bir kishi bo‘lgan, xolos.

Holbuki, KIIP va TOPIK sertifikatlari talabalarga universitetda ham, viza cho‘zishda ham juda katta foyda beradi.

Yangi kelgan va kelayotganlarga maslahatim Koreyaga kelganingizdan keyin uzoqni ko‘zlab maqsad qo‘yinglar. Koreyaga kelishning o‘zi bir qiyinchilikni yengish bo‘lsa, endi bu yerda qoidani buzmasdan, tilni yaxshi bilib, “yashab qolish” ikkinchi, sizni kutib turgan katta qiyinchilik.

Instagramda “Koreyada...” deb boshlanadigan videolar sizga viza cho‘zishda ham, universitetni bitirishda ham yordam bermaydi. Aksincha, zavod yoki qurilishda ishlayotgan joyingizni “musofirchilik qiyin” deb joylayotgan videolaringiz vaqti kelganda o‘zingizga zarar bo‘lib ishlashi ham mumkin.

Musofirchilik hayoti faqat Koreyada emas. Rossiyada yashayotganlar uchun ham, Amerikada yashayotganlar uchun ham oson emas.

Qayerda bo‘lishingizdan qat’i nazar, chet elda yashashning o‘ziga yarasha qiyinchiliklari bor. Shuning uchun faqat bugunni emas, bir necha yil keyingi hayotingizni ham o‘ylab harakat qilish kerak.

Junior vs senior?

Junior dasturchining sifatlari:
- bilmaganini soʻramaydi
- hamma narsani oʻzim qilishim kerak deb oʻylab muammoni yecha olmasa ham indamaydi
- yaxshi tushunmagan narsasini uyalib yoki boshqalar meni bilmaydi deb oʻylamasin deb tortinib hamkasblaridan yordam soʻramaydi

Oqibatda oʻzini oʻzi qiyin ahvolga qoʻyib loyihani vaqtida bajara olmay muammoni kattalashtiradi.

Kuzatishlarimning natijasida, hayotdagi "junior" odamlarning ham sifatlari, junior dasturchilarnikiga oʻxshab ketadi degan xulosaga keldim.

- muammosini faqat ichiga yutib oʻzim hal qilaman deb yuradi
- doʻstlaridan yordam soʻramaydi yoki maslahat olmaydi
- kimdir yordam bersa edi kutadiyu lekin muammoni ichiga yutib oʻzini stressga qoʻyadi

Oqibatda oʻzini qiyin ahvolga qoʻyib, yon-atrofdagilarga jahl qiladi. Hissiyotlarini boshqara olmay muammoni kattalashtiradi.

Har ikki holatda ham juniorlar bir muhim narsani anglab yetmaydi:
Boshqalardan yordam soʻrash yoki bilmaganini bilmadim deb tan olish ayb emas aksincha muammoni yechish uchun eng tez yoʻl ekanini bilishmaydi.

Hayotda hech kim hamma narsani bilmaydi. Dasturlashda katta tajribaga ega dasturchilar ham kerak boʻlsa bilmaydigan holatlari boʻladi. Lekin tajribali dasturchilar soʻrash yoki yordam olishdan tortinmaydilar. Ular, bir muammo ustida qotib qolsalar, hamkasblaridan soʻrab koʻrish yoki birgalikda muammo ustida ishlash bilan muammoni tezroq yechish mumkinligini yaxshi bilishadi. Shuning uchun yordam soʻrashdan tortinmaydilar. Eng muhimi, dasturlashda hamma narsani bilmasliklarini yaxshi biladilar.

Dasturlashda 10 yil ishlab yurib ham junior darajada qolib ketish mumkin. Shunchaki dasturchi boʻlib ishlash bilan, muammolarni yechib tajriba orttirishning farqi katta. Hayotdagi "senior" tajribali va "junior" tajribasiz kishilarning farqi ham ularning yashab oʻtgan yillarida emas balki oʻsha umr davomida qanchalik muammoni boshdan kechirganiga bogʻliq deb oʻyliyman. Senior va junior dasturchining farqi qancha koʻp ishlaganida yoki ish tajribadagi yillarda emas balki qancha koʻp va murakkab muammoni yechganida.

Bugungi onlayn uchrashuvdan taassurotlar

Uchrashuvga vaqt ajratib qatnashgan barchaga oʻz minnatdorchiligimni bildiraman!

Quyida uchrashuvdan olingan xulosa va fikrlar:

2026-yilda Koreys kompaniyalari (xorijlik) nomzodlardan nimani xohlaydi?

-AI yoki AI agentlar bilan qay darajada ishlay oladi?
- Qaysi takrorlanuvchi vazifani yoki muammoni AI avtomatlashtirish orqali yechgan?
- Biror qiymatga ega loyihasi bormi? End-to-end (boshidan oxirigacha) biror loyihani bajarganmi?

Koreys ish beruvchilarning chet ellik dasturchilarni ishga yollashda asosiy oʻylovi:

- Koreys tilida erkin muloqot qila oladimi? Documentation (hujjatlashtirish), hisobot, va jamoaviy muloqot paytida Koreys tilida bemalol gaplasha oladimi?

- Zimmasiga yuklatilgan vazifani yaxshi olib keta oladimi? Texnik bilimi qay darajada?

- Kompaniya madaniyatiga moslashib keta oladimi? Jamoa bilan kelishib ishlay oladimi?


Mansurbek aka:

Talabalar, ishlarini biror mutaxassis baholamasdan turib oʻzini koʻp narsani bilaman deb oʻyladi. Sizning qobiliyatingizni tashqaridan soha mutaxassisi baholashi kerak

AI sohasida oʻqib diplom olmagan boʻlsa ham, ishga kirishi mumkinmi? Mumkin. Bunda albatta ustunlik AI sohasida oʻqigan diplomi bor nomzodda boʻladi. Lekin, sohada diplomi boʻlmasa ham, kuchli tarafini yetarlicha koʻrsatib bera olsa ishga kirishi mumkin.

Oʻzbekistonda AI mutaxassislariga talab qanday?
Oʻzbekistonda AI sohasida tajribaga ega malakali mutaxassislarga talab bor. Hozirda banklar, davat tashkilotlari, oziq-ovqat tarmoqlari, tijorat sohalarida AI keng tadbiq qilinmoqda.

Oʻylaymanki bugun nimadir foydali narsa oʻrgandingiz. AI sohasida ishlashga qiziquvchilar uchun Mansurbek Abdullaevning kanaliga havolani qoldiraman:
https://t.me/mansurbek_blog

Keyingi uchrashuvlarda ham bugungidek faol qatnashishga chaqirib qolaman. Salomat boʻling!

Live stream finished (2 hours)

Savollaringiz bo'lsa izohda yozib qoldiring

Onlayn vebinarga ulanish uchun havola

Live stream started

Live stream scheduled for Aug 29 at 11:00

Onlayn uchrashuv, 29-avgust, shanba, soat 20:00 (uzb vaqt bilan 16:00) da telegram kanalida jonli tarzda oʻtkaziladi.

Uchrashuvmiz mehmoni, https://t.me/mansurbek_blog, PhD, Sun’iy Intellekt mutaxassisi boʻladilar.

Ushbu hafta oxirida oʻtkaziladigan onlayn uchrashuvga berilgan ovozlar teng boʻlib qolibdi.

Vebinarni telegramda onlayn oʻtkazish rejalashtirilgan. Qatnashishga qiziquvchilar ovoz berib yuboringlar, hisobni yangilab qoʻyaylik)

Ovoz berish uchun post:

Koreyslardan yana nima oʻrgansa boʻladi?

Koreyslardan kamtarlikni oʻrgansa boʻladi. Ha, toʻgʻri oʻqidingiz, aynan kamtarlikni. Koreyslar inson feʼl-atvorida kamtarlikni eng yuksak fazilat deb baholashadi. Buni koreys tilida "겸손함" (kyomsonham) deyishadi. Xoʻsh, nega aynan ulardan bu hislatni oʻrganishimiz kerak?

Men Koreyada yetti yildan oshiq vaqt davomida yashab, universitetda oʻqib, talabalikdagi oddiy mehnatdan (arbaytdan) tortib yirik kompaniyalargacha boʻlgan yoʻlni bosib oʻtdim. Turli toifadagi odamlarni kuzatib shunday xulosaga keldim: biz oʻzbeklarga (ayniqsa, Koreyadagi koʻpchilik hamyurtlarimizga) baʼzan kamtarlik yetishmaydi. Quyida hayotiy kuzatuvlarimni siz bilan boʻlishmoqchiman.

1-holat: Universitet darslarida
Universitetda oʻqib yurgan yillarimda professor darsda osonroq savol berib, "Buni kim biladi?" deb soʻrab qolsa, oʻzimizning oʻzbek talabalari darrov javob berishga oshiqardi. Toʻgʻri boʻladimi, notoʻgʻrimi, nima bo'lsa ham gapirib qolishni istashardi. Xuddiki maktab davridagidek "Ustoz, men aytay, men aytay!" degandek tuyulardi menga. Koreyslar esa, aksincha, toʻgʻri javobni bilsalar ham, professor kelib, "Sen nima deb oʻylaysan?" deb shaxsan soʻramagunicha indamay eshitib oʻtirishardi.
Qizigʻi, professor murakkabroq savol bersa, biznikilar jim boʻlib qolardi. Eng yomoni, oraliq va yakuniy imtihonlar natijasi eʼlon qilinganda, oʻsha indamay, kamtarlik qilib oʻtirgan koreys talabalarning bahosi eng baland chiqar, tinmay gapirgan hamyurtlarimizniki esa zoʻrgʻa oʻtish baliga ilinar-ilinmas boʻlardi.

2-holat: Koʻchadagi "madaniyat"
Bir kuni koʻchada ketayotsam, orqadan mashinaning baland musiqasi eshitildi. Yaqin atrofda biron diskoteka yoʻq edi. Ortga oʻgirilib qarasam, eski bir "Matiz" oynalarini oxirigacha tushirib, bir qoʻlini eshikdan chiqarib, bir oʻzbek yigiti kelayotgan ekan. "Oʻzi minganing bit matiz boʻlsa, hammaning tinchini buzib, bunchalik kerilishga nima bor?" deydigan odam yoʻq.
Koreyada BMW, Mercedes, hatto Ferrari haydaydigan boy koreyslarning ham musiqani koʻchaga eshittirib, oynasini ochib yurganini koʻrmaysiz. Chet ellik sifatida koʻchada bunday yurishimiz mahalliy aholida "Bu xorijliklarning (외국인) madaniyati past ekan" degan salbiy taassurot qoldiradi.

3-holat: Seminardagi maʼruzam
Yaqinda mentor sifatida bir universitetga talabalarga sohaga oid ish topish mavzusida maʼruza qilishga bordim. Tinglovchilar orasida turli millat vakillari, magistrlar, PhD va bakalavrlar bor edi. Suhbat davomida koʻpchilikning xalqaro jurnallarda maqolalari chop etilganini, tajribasi juda boyligini bildim. Ammo men gapirayotgan paytimda bir qiz tinmay soʻzimni boʻlib, "Men unday qildim, bunday qildim" deb oʻz tajribasini hadeb oʻrtaga tiqishtiraverdi.
Ichimda: "Bu qiz buncha mahmadona boʻlmasa, oʻzi marketingda ishlagan ekan, IT seminarida nega buncha mahmadonalik qiladi? Chet elliklarda ham shunaqa mahmadonalar boʻlarkan-da", deb oʻyladim va uni Lotin Amerikasidan boʻlsa kerak deb taxmin qildim. Tanaffus paytida netvorking payti haligi qiz bilan gaplashib koʻrdim, shu payt miyamda go'yoki sariq lampochka yonib atrof yorishib ketgandek boʻldi. Bilsam oʻzbek qiz ekan, "iye ha, gap bu yerda ekanda!" dedim ichimda.

Xulosa oʻrnida shuni aytmoqchimanki, koreyslar kamtarlikni gapda ham, ishda ham, xulq-atvorda ham qadrlashadi. Ishga qabul qilish intervyularida ham oʻzini haddan tashqari maqtamay, kamtarlik bilan aniq javob bergan nomzodlarning imkoniyati yuqori boʻladi.

Kamtarlik bu goʻzal xulq. U yigitga ham, qizga ham birdek yarashadi. Qizlarga ibo va latofat bagʻishlasa, yigit kishi uchun yangi imkoniyatlar eshigini ochadi. Erkak kishining qiymatini baland musiqasi yoki balandparvoz gapi emas, qilgan ishi belgilaydi. Bilsangiz bajaring, natijangiz sizning o'rningizdan gapiradi.

Ilm majlisida kimdir jim tursa, uni bilmaydi deb oʻylamang, u sizdan ancha aqlli boʻlishi mumkin. Hamisha kamtar boʻlishga intilaylik. Aslida, kamtar boʻlishga koreyslardan koʻra biz koʻproq haqlimiz. Chunki bizga yoshligimizdan ota-onamiz, bobo-buvilarimiz qulogʻimizga quygan oʻgitlar va milliy qadriyatlarimiz bor. Biz shunchaki oʻsha tarbiyamizga amal qilsak yetarli. Xalqimiz bejiz aytmagan: "Kamtarga kamol — manmanga zavol".

[poll]

Koʻpchilik Koreyaga ketaman deb umid qilib qarz-qavola qilib pul topib beradi. Lekin "mashennikar" ga aldanib qolishadi. Hushyor boʻlaverish kerak, osongina pul berib Koreyaga kelishni oʻylamanglar. Koreyadan turib zavodga chaqirtirib beraman deganlarga ham ishonib qoʻymanglar. Unday qilishni imkoni boʻlganida, men, hamma bosqichdan oʻtib Koreyaga anchadan beri kela olmay yurgan qarindosh akamni chaqirib olgan boʻlar edim. Afsuski buni imkoni boʻlmadi shu paytgacha.

https://youtube.com/shorts/51xc1cV4TVU?si=9-uvSHdYl4BNriST

P.S: Bu yangilikni koʻrib Koreyaga kelmasdan ham yaxshi pul topsa boʻlar ekan deb oʻylab qoldim)

🇰🇷 Koreyada vizaga ariza topshirishda kerak bo'ladigan eng ko'p so'raladigan hujjatlar

Immigratsiya ofisiga borganizda to'ldirib topshirishingizga to'g'ri keladi. Agar hujjatlaringiz to'liq bo'lmasa, to'ldirib kelishga yuborishadi. Shu sababdan immigratsiyaga borishdan oldin kerakli hujjatlarning elektron nusxasini to'ldirib chiqarib borish tavsiya qilinadi. Quyida eng ko'p so'raladigan hujjatlar va ularning nima uchun kerakligi haqida:

통합신청서 — Umumiy ariza shakli
Bu asosiy ariza. Viza o'zgartirish yoki uzaytirish uchun immigratsiyaga topshiriladigan birinchi va eng muhim hujjat. To'ldirilmasa, boshqa hujjatlaringiz qanchalik to'liq bo'lmasin, ariza qabul qilinmaydi.

거주숙소제공사실확인서 — Turar joy taqdim etilganligi haqida tasdiqnoma
Koreyada qayerda yashashiniz va kim tomonidan joy taqdim etilayotgani rasman tasdiqlanadi. Immigratsiya organlari sizning yashash manzilingizni bilishi uchun bu hujjat kerak bo'ladi.

이적동의서 (견본) — Ish joyi o'tkazishga rozilik xati
Avvalgi ish beruvchingiz yangi ish joyiga o'tishingizga rozi ekanligini bildiradi. Ayniqsa E-7 va shunga o'xshash mehnat vizalarida talab qilinadi. Ba'zan ish beruvchi rozi bo'lmasa jarayon to'xtab qolishi mumkin — shu sababdan oldindan oydinlashtiring.

D-10-1 구직활동계획서 — Ish qidirish faoliyati rejasi
D-10 (ish qidirish) vizasida bo'lganlar uchun majburiy. Qanday sohalarda ish qidirayotganingizni, qanday qadamlar tashlayotganingizni yozasiz. Bu immigratsiyaga "men haqiqatan ish qidirmoqdaman" degan isbotingiz.

E-7-1 (특정활동) 자격변경 — Maxsus faoliyat vizasiga o'tish
Muayyan kasb yoki soha bo'yicha Koreyada rasman ishlash uchun kerak bo'ladigan hujjatlar yo'riqnomasi.

F-2-7 (점수제 우수인재) 자격변경 — Ball tizimi bo'yicha istе'dodli kadrlar vizasi
Yoshingiz, ta'lim darajangiz, ish tajribangiz, til bilimingiz va boshqa mezonlar bo'yicha ball to'playsiz. Yetarli ball bo'lsa, uzoq muddatli yashash huquqi (F-2) ga o'tish imkoniyatingiz bor.

F-1-15 (우수인재, 투자자 및 유학생 부모) — Oila a'zolari uchun viza
Koreyada o'qiyotgan talabaning (석･박사과정에서 6개월 이상 유학하며 체류 중인 자) ota-onasi, shuningdek yuqori malakali mutaxassislar va investorlarning yaqinlari uchun. Asosiy shaxsning huquqiy maqomiga bog'liq holda beriladi.

⚠️ Bu talablar vaqti-vaqti bilan o'zgarishi mumkin. Eng so'nggi va to'liq ma'lumot uchun 1345 ga qo'ng'iroq qiling.

📎 Hujjatlarning elektron namunalari postga ilova qilindi — immigratsiyaga borishdan oldin ularni to'ldirib chiqib boring, ishingiz ancha tezlashadi.

Bu postni viza masalasida hujjat tayyorlayotgan tanishlaringizga ulashib qo'ying, ularga ham kerak bo'lib qolishi mumkin.