YOZUVCHILAR UYUSHMASI QASHQADARYO VILOYATI BO'LIMI (RASMIY KANAL)

*

Бу дунё - бозор.

Текинга
ҳеч нарса
бермайди.

Ахир, ўтган умримга
қанча кунимни бердим,
қанча юрагимни бахш этдим шеърга.
Сўзлаш учун сўзимнинг зиёси
қанчалар оқди,
кўриш учун
кўзларимнинг нури
тўкилди қанча.
Қанча қон йиғладим
бир зарра
бахт кўйида...

Сени деб эса
ақлимдан
неча бор айрилдим,
муҳаббат.

Бу дунё - бозор.

Ҳеч нарсам қолмаса,
мени бўш қутидай
ташлаб кетаверади -
бу савдогар
дунё.

✍Усмон АЗИМ

https://t.me/qashqadaryo_adabiyoti

ИЗҲОР

Бир тилим ҳандалак, бир тилим ҳилол
Минг йил кўз ўнгимдан кетмагай ҳаргиз.
Сен — мангу халқдирсан, ризқ-рўзи ҳалол,
Мен — сендан тарқаган, кўкарган илдиз.

Одам атолардан нишоним дедим,
Сени бобом дедим, деҳқоним дедим.
Элин билмаганлар юртин қарғарлар,
Миннат қилганлар бор берган ош-нонин.

Кетди боғларингни босган қарғалар,
Азал булбулларга гўзал ошёним.
Тўрғайларга ўнғай маконим дедим,
Сени бағрим дедим, осмоним дедим.

Амир Темурлардан қолган номус-ор,
Бир синиқ ғишти ҳам шараф-шон юртим.
Сен — ўлмас ғурурсан, сўнмас ифтихор,
Суви ҳам, қуми ҳам зарафшон юртим.

Асрлар жўш урган дил қоним дедим,
Туғи абад баланд қўрғоним дедим.
Сен — ўн бешга тўлган отажонимсан,
Бешигинг ислари кетмаган ҳали.

Тожу тахтим менинг, зўр имконимсан,
Бори тириклигим, умрим сайқали.
Сени — қошу кўзим, мижгоним дедим,
Ўз уйимда ўсган султоним дедим.

Менинг бу дунёда бошқа онам йўқ,
Онажоним ўзинг — танҳо, ягонам.
Сен борсан — сўзимнинг бошоқлари тўқ,
Сен борсан — тинмагай тилдан таронам.

Сенга садқа бўлсин бу жоним дедим,
Сени жоним дедим, жаҳоним дедим.
Халқ бўлиб заминда кўз очган кундан
Қанчалар меҳнату миннат кўрдик биз.

Асли Истиқлолнинг ғояси шундан.
Жон чекиб, муҳташам давлат қурдик биз.
Эзгулик даргоҳим, майдоним дедим, Оламга очилган айвоним дедим.

Дунё ҳам бўлиниб тулпор, отларга,
Қувончу ғам деган тарафлар бўлгай.
Лекин эл-юртим деб ўтган зотларга
Абадият қадар шарафлар бўлгай.

Бир тонгда ушалган армоним дедим,
Кетмас бўлиб келган давроним дедим.

✍Сирожиддин САЙЙИД

2006.5.08.

https://t.me/qashqadaryo_adabiyoti

ЎЗБЕК ТИЛИМ

Кўп қадимман,
Карвон билан замонлар кечдим,
Нор туянинг норлиги ҳам афсона экан.
Бир кун туя айронини шифо деб ичдим,
Она туя номи эса арвона экан.

Давронимни сурганман ҳам оқ отга миниб,
Ҳай-ҳай, унинг қўлтиғида бор эди қанот.
Вақти келиб, шон-шуҳратдан ҳаёлим тиниб,
Билсам, ўша оқ отимни дерканлар - бўз от.

Юксак Ҳисор тоғларининг бағрида қат - қат,
Тошни ёриб ўсиб ётган наъматак эди.
Устоз Ойбек шеърин эслаб шоир Холмамат,
Бизнинг жойда унинг номи " Ҳулулу", деди.

Сен туганмас чашмадирсан, оҳ, она тилим,
Етмиш икки томиримга мавжларинг борди.
Бир кун тиниб қолган эди боғда булбулим,
Сандулочим ! - деган эдим сайраб юборди.

Инсон деган қутлуғ сўзнинг тенги йўқ ҳеч бир,
У танҳодир, фалакларнинг қуёши мисол.
Лекин манов болакайдир, буниси ўсмир,
Бу йигитдир, бу зот эса бобо, оқсоқол.

✍Абдулла ОРИПОВ

2013 йил

https://t.me/qashqadaryo_adabiyoti

O‘zbekiston xalq yozuvchilari Xayriddin Sulton, Erkin Aʼzam, O‘zbekistonda xizmat ko‘rsatgan madaniyat xodimi, yozuvchi Xurshid Do‘stmuhammad, O‘zbekistonda xizmat ko‘rsatgan yoshlar murabbiysi, yozuvchi Komiljon Sindarov va kutubxonachilar bilan bo‘lib o‘tgan ijodiy uchrashuvni to‘liq tomosha qiling!

https://youtu.be/AbPcpIQNvac?si=x-uQSpTCOIcnIqcV

SOHIR IJODIY UCHRASHUVLAR

So‘lim tog‘lar bag‘ridagi Parkent ijod uyida “Adib va kutubxona” seminar-treningining ikkinchi kuni ham adabiyotning jonli nafasi, samimiy muloqotlar va adabiyotga oshufta qalblar uchrashuviga aylandi.
Kitobxonlikni targ‘ib etish, adiblar va kutubxonachilar o‘rtasidagi ijodiy hamkorlikni mustahkamlashga qaratilgan tadbirning ikkinchi kunida ham kutubxonachilar uchun unutilmas lahzalarga boy bo‘ldi. Bu gal ular o‘zlari mutolaa qilgan asarlar mualliflari bilan yuzma-yuz uchrashib, kitob sahifalari ortidagi ijodiy tafakkur va hayotiy kuzatishlar haqida suhbatlashish imkoniga ega bo‘ldi.
O‘zbekiston xalq yozuvchilari Xayriddin Sulton, Erkin A’zam, O‘zbekistonda xizmat ko‘rsatgan madaniyat xodimi, yozuvchi Xurshid Do‘stmuhammad, O‘zbekistonda xizmat ko‘rsatgan yoshlar murabiysi, yozuvchi Komiljon Sindorov, O‘zbekistonda xizmat ko‘rsatgan madaniyat xodimi Farida Afro‘z, shoirlar G‘ayrat Majid va Shahriyor Shavkat kabi ijodkorlar ishtirokidagi uchrashuvlar adabiyotning inson tafakkuridagi o‘rnini yana bir bor namoyon etdi.
Suhbatlar markazida kitob, ijod va yozuvchi va kitobxon munosabati turdi.
Kutubxona – faqat kitoblar saqlanadigan joy emas, balki tafakkur shakllanadigan, dunyoqarash kengayadigan, inson o‘zini va olamni anglashni o‘rganadigan ma’naviyat dargohi ekani aytildi.
Adiblar kitobxonlikning ijodkor hayotiga ta’siri, mutolaaning yangi g‘oyalar tug‘ilishidagi ahamiyati, kitob bilan muloqotning inson ruhiyati va tafakkuriga ta’siri xususida o‘z qarashlarini o‘rtoqlashdi.
Ijodkorlar bilan bunday uchrashuvlar kutubxonachilar uchun ham alohida ahamiyatga ega bo‘ldi. Chunki kitobni kitobxonga tavsiya etadigan, asarning mazmuni va badiiy qimmatini anglashga ko‘maklashadigan kutubxonachi adabiyot bilan kitobxon o‘rtasidagi muhim ma’naviy ko‘prikdir.
Tadbirning yana bir fayzli manzarasi shoirlar va kutubxonachilar o‘rtasidagi mushoira bo‘ldi. She’riyatning dilbar ohanglari, so‘z sehri va shoir qalbidan tug‘ilgan tuyg‘ular davraga o‘zgacha ruh bag‘ishladi.
Parkentning musaffo havosida kechgan suhbatlar esa vaqt o‘tgani sari yanada qizg‘in tus oladi. Adiblar va kutubxonachilar o‘rtasidagi muloqot rasmiy uchrashuv doirasidan chiqib, fikrlar, taassurotlar va mehr almashadigan samimiy davraga aylandi.
Kitoblarga qo‘lxatlar yozildi, tarixga suratlar muhrlandi, dildan chiqqan so‘zlar dillarga yetib bordi. Eng muhimi, kitobxonlar sevimli ijodkorlari bilan yaqindan tanishish, ularga o‘z savollarni berish va adabiyot haqidagi tasavvurlarini boyitish imkoniga ega bo‘ldi. Aslida kutubxonachi kitobxonga yangi asarni tavsiya etganda, o‘quvchi kitobni qo‘liga olganda, yosh qalb adabiyot orqali o‘z hayotiga boshqacha nazar tashlaganda bu kabi uchrashuvlarning natijasi ko‘rinadi.
“Adib va kutubxona” seminar-treningi mazmuni ham shunda – kitobga muhabbatni mustahkamlash, ijodkor va kitobxon o‘rtasidagi masofani qisqartirish, kutubxonachilik kasbining jamiyat ma’naviy hayotidagi o‘rnini yanada yuksaltirishdir.
Ikki kun Parkentda faqat kitoblar emas, qalblar ham ochildi. So‘z qadr topdi, adabiyotga mehr ortdi. Shu mehrni kitobxonga yetkazishni o‘z vazifasi deb bilgan kutubxonachining qadri e’tirof etildi.

O‘zbekiston Yozuvchilar uyushmasi Axborot xizmati

ХАЙР ДЕМА, СЕВГИЛИМ

Бу дунёнинг армонлари кўп экан, Кетар бўлсанг,томонлари кўп экан, Чечагидан сомонлари кўп экан, Хайр дема, хайр дема, севгилим.

Ярми қора,ярми оқдир дунёнинг, Ярми саҳро,ярми боғдир дунёнинг, Ярми висол,ярми доғдир дунёнинг, Хайр дема, хайр дема, севгилим.

Сен истасанг гуллар рўйи жаҳоним, Яна бўйин таратади райҳоним, Чаманларга айланади сайхоним, Хайр дема, хайр дема, севгилим.

Хайр десанг,бу дунёда нетаман, Бошим олиб қаёнларга кетаман, Сени излаб бўзлаб-бўзлаб ўтаман, Хайр дема, хайр дема, севгилим

✍️Хуршид ДАВРОН

Кўзингдан бошқа юлдуз йўқ... Хуршид Даврон шеъри & Мусиқа, аранжировка ва AI вокал: Суннат Қўзиев / Ko'zingdan boshqa yulduz yo'q... Xurshid Davron she'ri & Musiqa, aranjirovka va AI vokal: Sunnat Qoʻziev . https://www.youtube.com/watch?v=rBqr5WCmP6o