🌷САДОҚАТ.🌺РАҲИМА🌹 МЎМИНОВА 🌹ИЖОДИ✍

УМР АТАЛМИШ ГУЛЗОРДА…

Гуллар орасида очилган бир гул бўлиш осон, аммо бировнинг қалбида умрбод сўлмайдиган гул бўлиб қолиш — ҳақиқий санъат…
Зеро, гўзаллик юздаги нур билан ўлчанмайди, у кўнгилдан кўнгилга ўтган меҳрнинг ёруғлигида яшайди.
Мен умр аталмиш гулзорда шундай из қолдиришни истайманки, йўлимдан ўтганлар қалбида яхшиликнинг бир чечаги очилсин, исмим эсланганда юзларда табассум, кўнгилларда илиқлик уйғонсин…
Ахир, гулнинг умри қисқа бўлиши мумкин, аммо у улашган хушбўйлик хотираларда йиллар бўйи яшайди…

✍️ РАҲИМА МЎМИНОВА

@RahimaMuminovaKanali

ХАЙРЛИ ТОНГ, КЎНГИЛИ НОЗИКЛАР!

Баъзи тонглар бор — қуёшдан олдин инсоннинг кўнгли уйғонади. Ҳали деразаларга ёруғлик қўнмаган, ҳали қушлар осмонга қўшиқ сочмаган бўлади-ю, ичимизда нимадир қанот қоқади…
Гўё тақдир номимизга айтилмаган бир хушхабарни йўллагану, унинг овози ҳали манзилга етиб келмаган.
Бугун ана шу номаълум қувончни кутинг! Балки бир ширин хабар, бир самимий нигоҳ, бир оғиз кутилмаган сўз кунингизнинг энг гўзал хотирасига айланар…
Ахир, ҳаётнинг энг нозик мўъжизалари баъзан шовқинсиз келади — худди гулнинг ичида тонг отгандек…
Кунингиз кўнглингизга муносиб гўзалликлар олиб келсин!

✍️ РАҲИМА МЎМИНОВА

@RahimaMuminovaKanali

😄😄😄😄

ХАЙРЛИ ТОНГ, КЎНГЛИ ГЎЗАЛЛАР!

Тонг осмоннинг киприкларига илинган шабнамдек аста уйғонмоқда… Саҳар эса туннинг қора сочларини силаб, оламга нурдан тўқилган рўмол ёпмоқда. Қуёш — умидларнинг олтин тангачасидек, уфқнинг кафтларида жилоланмоқда…
Ҳар бир тонг — тақдирнинг бизга берган янги оқ варағи. Унга аламларни эмас, меҳрни ёзайлик; хафаликни эмас, шукроналикни битайлик. Ахир, кўнгил ҳам гулзорга ўхшайди: унга қандай туйғу уруғини қадасангиз, умрингиз ҳовлисида ўша гул очилади…
Бугун бахт эшигингизни майин шабададек секин қоқсин, қувонч қалбингизга баҳорнинг илк чечагидек очилсин. Ниятларингиз осмондаги юлдузлар каби порласин, дуоларингиз эса қанотли қушлардек Раҳмон даргоҳига парвоз қилсин.

Тонгингиз нурга, кўнглингиз меҳрга, дастурхонингиз баракага, умрингиз эса қадрингизни биладиган инсонларга тўлсин!
Хайрли тонг, азизларим! Бугун қалбингизга дунё сиғмаса ҳам, дунёдаги энг гўзал туйғулар қалбингизга сиғсин…

✍ РАҲИМА МЎМИНОВА

@RahimaMuminovaKanali

Мен баҳор эмасман — қайтиб келгани...
Менинг ҳам ўз фаслим бор эди. Кўнглимда гуллар очилган, сўзларимда илиқлик, кўзларимда эртанги кунга ишонч бор эди. Энди эса... нимадир ўзгарди.
Бугун ўзимни ўзим танимай қолдим.
Илгари мени қувонтирган нарсалар энди бефарқ қолдиради. Илгари интиқиб кутган кунларимнинг ҳам фарқи йўқдек. Кимдир «Нима бўлди?» дейди. Мен эса жавоб излайман... аммо ўзим ҳам тополмайман.
Балким, мен чарчагандирман.
Одамлардан эмас... кутганларимдан.

Сўзлардан эмас.. айтилмай қолганлардан.
Ҳаётдан эмас... унда ўзимни йўқотиб қўйганимдан.
Мен баҳор эмасман — қайтиб келгани...
Қайтиб келишга ҳамма нарсанинг имкони бордир, аммо баъзи ҳислар ортга қайтмайди. Баъзи табассумлар аввалгидек бўлмайди. Баъзи инсонлар эса ўз қалбининг қайси эшигини ёпиб қўйганини ўзи ҳам билмай қолади.
балки баҳор қайтиб келмас...
Аммо инсоннинг кўнглида бошқа бир фасл бошланиши мумкин.
Мен ҳозир шу фаслни кутяпман.
Жимгина...
Ҳеч кимга билдирмай...
Ўзимни ўзим қайта топиш умидида.

✍Раҳима Мўминова

Бугун ҳеч нарсага кўнглим йўқ...
На гаплашгим келади, на кулишга ҳавасим бор. Илгари завқ билан қилган ишларим ҳам бугун бегонадек. Телефоним қўлимда, аммо ҳеч кимга ёзгим келмайди. Атрофимда ҳаёт давом этаяпти, мен эса гўё унинг четида жимгина турибман...
Нима бўлганини аниқ тушунтириб ҳам беролмайман. Фақат ич-ичимдан нимадир оғирлашган. Кўнглим чарчаган...
Балки менга маслаҳат эмас, бироз сукут керакдир. Балки «кучли бўл» деган гап эмас, «чарчаган бўлсанг, майли, бироз дам ол» деган меҳр керакдир.
Шунинг учун бугун ўзимдан ҳеч нарса талаб қилмайман.
Ҳаммага ёқишим шарт эмас. Ҳамма нарсага улгуришим шарт эмас. Ҳар куни қувноқ бўлишга ҳам мажбур эмасман.
Бугун шунчаки ўзимни асрайман...
Чунки биламан: кўнгил ҳам баъзан қишлайди. Аммо ҳеч бир қиш абадий эмас.
Бугун ичимда қуёш кўринмаётган бўлса ҳам, унинг борлигига ишонаман. Эртага бўлмаса, индинга... бир кун албатта кўнглим яна нимагадир қувонади.
Ҳозир эса...
Менга фақат бироз меҳр, бироз сукут ва «ҳаммаси яхши бўлади» деган ишонч керак. 😔

✍️РАҲИМА

Хайрли кун

ХАЙРЛИ ТОНГ

Энг гўзал ҳижрон азият
бермайдиган ҳижрондир.

Энг гўзал кечириш таъна қилмай кечиришдир.

Энг гўзал сабр шикоятсиз сабрдир.

АССАЛОМУ АЛАЙКУМ!

Бугунги янги кун муборак бўлсин, қалбингизга ғурур, қаддингизги сурур, юзингизга табассум меҳмон бўлиб келсуну, қайтиб ҳеч ҳам сизни тарк этмасин.

Бир умр шодликка дўст, ғам қайғудан йироқ бўлишингизни сўраб қоламан.

Бугунги янги кун файзли баракотли бўлсин.

«Яхшимисиз?» деб сўрашни унутманг…
Чунки баъзи инсонлар «яхшиман» дейди-ю, ичида бутун бир дунё йиғлаб турган бўлади.
Баъзан бир оғиз ҳол сўраш — узоқ суҳбатдан ҳам қадрли.

Бир «Сизни ўйладим» деган сўз — ёлғиз қалбга суянч.

Бир «Ўзингизни эҳтиёт қилинг» деган гап — кимгадир бутун кунлик илиқлик.
Шунинг учун бугун кимнидир эсласангиз, қўнғироқ қилинг.

Кимнидир соғинсангиз, ёзинг.

Кимнингдир кўнгли сизга яқин бўлса, билдиринг.
Меҳрни ичимизда сақлаб юришга умр кафолат бермаган…

Айтинг. Сўранг. Қадрланг.

«Яхшимисиз?» денг — балки кимнингдир бугунги энг керакли сўзи шу бўлар…

РАҲИМА МЎМИНОВА

Баъзан инсонга катта-катта совғалар ҳам керак эмас…

Унга шунчаки: «Яхшимисиз?» деган бир оғиз сўз етарли.
Чунки бу саволнинг ичида — эътибор бор, соғинч бор, меҳр бор.

«Сизни ўйладим», «Сиз мен учун қадрлисиз», «Кўнглингиз тинчми?» деган айтилмаган гаплар бор.
Шунинг учун бугун бир дўстингизни, бир яқинингизни эслаб, ҳолидан хабар олинг.

Балки у айнан сиздан келадиган бир оғиз ширин сўзга муҳтождир…
«Яхшимисиз, азизим?»Кўринадики, жуда оддий савол.Аммо баъзи қалбларга у — бутун бир меҳр.

меҳрли инсоннинг сўзи ҳам меҳр бўлиб эшитилади.

✍️ Раҳима Мўминова

~Кетма,- дейсан менга ёлвориб,
Кўзларингда қолар бир савол.
Кетгим келмас, асли, менинг ҳам,
Лекин, тақдир...
қолишим маҳол.

~Кетма,-дейсан, титрайди юрак,
Сўзларингдан меҳр ёғади.
Мен кетсам ҳам, билгин, юрагим,
Сенинг билан бирга қолади.

Бир қарашинг — мингта гап эди,
Бир сукутинг — мингта изтироб.
Сендан кетиш осон эмасу,
Сен-ла яшаш — ундан ҳам азоб.

~Кетма,- дейсан, мен эса жимман,
Кўзларимдан ёшлар тўкилар.
Сендан йироқ кетсам, азизим,
Юрагимга армон экилар.

~Кетма,-
дейсан,
кетмасам
бўлмас..

✍РАҲИМА МЎМИНОВА. 17.08.2026

Рашк қилдим…

Лекин билдирмадим.
Кулиб турдим, гаплашдим,

ҳатто «майли» ҳам дедим.

Фақат юрагим ичкаридан:

«Бу қадар ҳаммага кулиб қарама…

мен ҳам бор-ку!» — деб нозланди.
Аслида рашк — ёмонлик эмас экан.

Унинг тагида бир ширин қўрқув ётаркан:

«Мен учун қадрли бўлган инсонни

бировга бой бериб қўймайин…»
Шунинг учун баъзан рашк қилсам,

хафа бўлма…

Бу — жанжал эмас,

юрагимнинг сенга билдиролмаган

энг ширин эътирози.

РАҲИМА МЎМИНОВА

Рашк — муҳаббатнинг энг шовқинсиз, аммо энг баланд овози.
У «сен меникисан» деб бақирмайди…

Фақат кимдир сизнинг исмингизни меҳр билан тилга олса, юрак бир зумга жимиб қолади.
Рашк — ишончсизлик эмас ҳар доим.

Баъзан у — «сени йўқотишдан қўрқаман» деган тан олинмаган иқрор.
Аммо ҳақиқий муҳаббатда рашк ҳам одобли бўлади:

у севганини қамамайди,

назорат қилмайди,

фақат ич-ичидан:

«Мени ҳам бировдан қизғангинг келса эди…» — деб қўяди.

✍РАҲИМА МЎМИНОВА