Шоҳира Ҳамро

🖊️Она тилим

Гарчи зуғум қилганларни ёқтирмадим,
Шеър ёздиму бўлак ишни қотирмадим.
Тилим туриб ўз тилимда гапирмадим,
Бир эсласам эзилади бағри-дилим,
Она тилим, кечир мени, она тилим.

Онам «эркам» деб қучганда тунлар ярим,
Эрким йўқ деб зирқирарди бир жойларим,
Паровозни ҳансиратган буғдойларим,
Олтинларим, маъданларим, ипакларим,
Она тилим, кечир мени, она тилим.

Кимлар учун биз эдик бир бадавийлар,
Ўзбекни қон қақшатганни ўзбек сийлар,
Ҳолимизни қон кузатди Яссавийлар,
Топганимиз ҳандалакдек тилим-тилим,
Она тилим, кечир мени, она тилим.

Кимдир майда миллат бўлди, кимдир катта,
Катта миллат — Афандиси йўкдир ҳатто,
Биз пиёда, биз боққанлар юрди отда,
Зулм ўтса фақат сендан ўтди зулм,
Она тилим, кечир мени, она тилим.

Сен бўлмасанг нима бизга силлик шеърлар,
Бу дунёда тили йўкда дил йўқ дерлар,
Баҳоинг-ку бериб кетган Алишерлар,
Юрагимнинг тўридаги сўлмас гулим,
Она тилим, кечир мени, она тилим.

Бир қарасам ҳар шевангда минг жилолар
Ҳар новдангда, ҳар мевангда минг жилолар.
Қодирийлар, Чўлпонлар-у, Абдуллолар,
Сенинг қайтган кунинг мен туғилган йилим,
Она тилим, эй муқаддас Она тилим.

Мухаммад Юсуф

https://t.me/SHohiraHamro

💟💟💟

🖊ҚИШЛОҚ АЁЛЛАРИГА

Мен шу халқнинг ҳолидан хабар
Олгувчиси бўлолдимми ҳеч.
Бахтлар ташлаб кетса ёнида
Қолгувчиси бўлолдимми ҳеч?

Эй, онамдай мустар аёллар,
Жаннатий бахт истар аёллар,
Эй ердек хокистар аёллар,
Сўзингизга ўхшолдимми ҳеч?

Болангизнинг кийган калиши,
Юрагимни қийнар нолиши,
Гарчи ғамгин нигоҳ солишим,
Бўзингизга ўхшолдимми ҳеч?

Билдингизми ҳеч бахтнинг таъмин,
Жим кузатиб дунёнинг ғамин,
Қайғу чўккан, ғамгиндан ғамгин,
Кўзингизга ўхшолдимми ҳеч?

Минбарларда берилган ваъда
Руҳингизга бўларми далда,
Офтобларда ёруғ, афтода,
Юзингизга ўхшолдимми ҳеч?

Борми сиздек фироқда қолган,
Бахт ёдидан йироқда қолган,
Саратонда тупроқда қолган
Изингизга ўхшолдимми ҳеч.

Қалбингизга сўзларим чўкиб,
Бораяпман кўз ёшим тўкиб,
Сиз онамга ўхшайсиз, лекин,
Қизингизга ўхшолдимми ҳеч?

✍🏼Гулжамол Асқарова шеърини
🎤Шоҳира Ҳамро ўқиди.

https://t.me/SHohiraHamro

🖊️«ЧИН ДЎСТИМ»ГА

Курашмасдан курагимни синдирган дўст,
Сочимга оқ, кўзимга ғам индирган дўст.
Бировларнинг кўзин ёшлаб қўймасангиз,
Кўзингизни Худо ёшлаб қўярмиди?

Сув дермидим юракларим куймаганда,
Не қилардим суйганларим суймаганда,
Шайтон аввал кўнглим хушлаб қўймаганда,
Раҳмон менинг кўнглим ғашлаб қўярмиди?

Хато қилдим,
хатоларда юрдим бесар,
Қутқармади на бир дўстим, на сийму зар,
Худойимдан бир ишора бўлмаса гар,
Бандалари бир иш бошлаб қўярмиди?

Эл ичида азизлардан азиз билиб,
Бошгинамни балолардан омон қилиб,
Ўз ҳиммати турганида келиб-келиб,
Худо мени Сизга ташлаб қўярмиди?

Курашмасдан курагимни синдирган дўст.

✍🏼Guljamol_Asqarova

https://t.me/SHohiraHamro

✍🏼 БУГУН ТУНДА , КЕЛАРМИШ БАХОР…

Деразангдан мўралаб аста,
Гул юзингдан бўлиб шикаста,
Узун қишга силтаб қўлини,
Ҳам қалбингдан бошлаб йўлини,
Тўққиз ойки, елармиш баҳор,
Бугун тунда келармиш баҳор...

Қору музни сувга ғарқ қилиб,
Изғиринни буткул тарк қилиб,
Эшитгандек менинг ноламни,
Гулдастага ўраб оламни –
Тушда бошинг силармиш баҳор,
Бугун тунда келармиш баҳор...

Гўзалликни элтиб жаҳонга,
Сано айтиб ҳар ўтган онга,
Жамолингга бўлиб маҳлиё,
Истарангдан олганча зиё-
Бизга иқбол тилармиш баҳор,
Бугун тунда келармиш баҳор...

Унутилар ҳазонрез кузак,
Табассуминг юзингга безак.
Меҳрларинг менга оғдириб,
Ёмғирларин ерга ёғдириб,
Сувларини элармиш баҳор,
Бугун тунда келармиш баҳор...

Ҳиссиётга тўлдириб дилни,
Кенгайтириб кичик кўнгилни,
Дуоларга ижобат етиб,
Табиатни чаманзор этиб,
Бахтимиздек кулармиш баҳор,
Бугун тунда келармиш баҳор...

✍🏼Масъуд Махсудов.

"МУМТОЗ ДАВРА" туркумидан. Эсон Давлат Бегим– Бобурнинг бувиси..
Чиғатойхон наслидан бўлган Юнусхоннинг хотини. Оқила, доно ва меҳрибон аёл.. Салтанатни бошқаришда фаол қатнашган. Бобур Мирзонинг тарбиясида муҳим рол ўйнаган. Қолган ролларда: Шаҳноза Соатова, Dilnozakhon Kattakhanova, Барногул Санакулова, Азиза Курбонова, Навбахор Каримова, Меҳриноз Аббосова ва Елена Чуянова Бугун ҳар кўнгилга севимли Заҳириддин Муҳаммад Бобур таваллуд куни.

Биз бу сафар бобурий маликалар образида Мирзо Бобур рубоий, байтларини ўқидик. Бу маликаларнинг ҳар бири Бобурийлар силсиласида ўз тарихий ўрни ва овозига эга. Видеони кўришдан аввал қисқа биографияни ўқиб чиқасиз деган умиддамиз.

Эсон Давлат Бегим Шохира Хамро – Бобурнинг бувиси.
Чиғатойхон наслидан бўлган Юнусхоннинг хотини. Оқила, доно ва меҳрибон Эсон Давлат Бегим салтанатни бошқаришда фаол қатнашган, Бобурнинг тарбиясида муҳим рол ўйнаган.

Қутлуғ Нигор хоним Барногул Санакулова – Бобурнинг онаси.
Темурий ҳукмдор Умаршайх мирзонинг тўнғич хотини. Бобурнинг Темурийлар салтанатини инқироздан сақ-лаб қолиш мақсадидаги ҳаракатларида мададкор бўлган, дарбадарлик вақтларида ҳамроҳлик қилган.

Хонзода Бегим Shahnoza Soatova – Бобурнинг опаси.
Темурий ҳукмдор Умаршайх Мирзонинг қизи. Укаси Бобурни қамалдан озод қилиш учун Шайбонийхонга турмушга чиққан. Ақл-идроки ва тадбиркорлиги туфайли сарой аҳли орасида ҳурмат ва эъзозга сазовор бўлган.

Моҳим бегим Навбахор Каримова – Бобурнинг хотини
Бобур подшоҳнинг хотинлари орасида энг оқила ва билимдони. Бобурнинг фарзандларини, хусусан, Хумоюн, Ҳиндол мирзолар ва Гулбадан бегимни тарбиялаган.

Гулбадан бегим –Азиза Қурбонова, Бобурнинг қизи.
Замонасининг барча билимларидан бохабар бўлган, оқила, доно аёл. Отасининг тарихнавислик анъаналарини давом эттириб, “Ҳумоюннома” асарини ёзган.

Аржуманд бону Dilnozakhon Kattakhanova – Мумтоз Маҳал (саройнинг кўрки)
Шоҳ Жаҳоннинг рафиқаси. Нозик табиати, иффати, тенгсиз ҳусн-латофати ва дипломатияси билан эътибор қозонган. Шоҳ Жаҳон унга атаб машҳур “Тож Маҳал” мақбарасини қурдирган.

Жаҳоноро бегим (Елена Чуянова Елена Чуянова ) – бобурийзода малика
Шоҳ Жаҳон ва Аржуманд бонуларнинг қизи. Тарихчи, шоира, олима аёл. Тасаввуф тариқатлари ҳақидаги “Соҳибия” номли рисола муаллифи.

Зебинисо Меҳриноз Аббосова – бобурийзода малика
Шоҳ Аврангзебнинг қизи. Шоира, тарихчи, файлксуф олима. Тўрт минг байтдан иборат ғазаллар ва “Зеби Тафсир” номли Қуръонга шарҳлар китоби муаллифи.

🥳🥳🥳🥳

❤️BUGUN – «Xalqaro qishloq ayollari» kuni!

2008 yildan buyon — ya’ni 17 yildirki, 15-oktyabr dunyoda Qishloq ayollari kuni sifatida nishonlanib kelinmoqda.

❤️Pardozni yuzlari hech ham ko‘rmagan,
Qimmat restoranga bir bor kirmagan.
Ro‘zg‘orning tashvishidan bo‘yin burmagan,
Sabringizga ta’zim qilay qishloq ayoli!

***
Ҳўрсинмагин,
жон, дўстим,
ўнгга қара, сўлга боқ,
Ҳар шоҳида марварид,
Мажнунтол ҳам йиғлар, тоқ.
Бу кунлар ҳам ўтади, у кунлар ҳам ўтди-ку.

Дунё
ўзи тор йўлак,
Жуфтинг сиғмас ёнингга.
Ортда ғийбат, хусумат,
Ҳамла қилар жонингга.
Бу кунлар ҳам ўтади, у кунлар ҳам ўтди-ку.

Келди
Қанча хоқонлар,
Искандару Доролар.
ўтди, гарчи пайғамбар,
Авлиёю доҳолар.
Бу кунлар ҳам ўтади, у кунлар ҳам ўтди-ку.

Сен
йиғлагин, йиғлама,
Вақтнинг сенга вақти йўқ,
Тошга тегар пешонанг,
Тошнинг эса кўнгли тўқ.
Бу кунлар ҳам ўтади, у кунлар ҳам ўтди-ку.

Юр,
кетамиз, зорларга,
Кўнгли яра доғларга.
Тушиб қолган умр йўқ,
Калхатлару зоғларга.
Бу кунлар ҳам ўтади, у кунлар ҳам ўтди-ку.

✍🏼Фарида Афрўз


https://t.me/SHohiraHamro

Бир аёлдек бахтли яшамоқчидим...

Гулжамол Асқарова шеъри
Шоҳира Ҳамро ижро этди

🖊️***
Ҳар кеча
хотиринг юракка қайтар,
забт этар
лаҳзада
жону жисмимни.
Ташқари чиқаман —
кеча мунаввар...
Шунда
такрорлайман йиғлаб исмингни.
Аммо ўртамизда бепоён кеча —
юлдузлар ўртанган сокин бир хилқат.
Ёлғизим,
мабодо
овозим етса,
ишонма...
йиғлама...
унутма фақат.

✍🏼Усмон Азим

https://t.me/SHohiraHamro

🖊️40 дан кейин...

Гарчи ҳали яшаганим йўқ,
Умр ўтди сувдек, хаёлдек.
Сочларимни йиғаман энди,
Ақлин йиғиб олган аёлдек.

Ҳа, баҳормас кузга ўхшайман,
Сочларимни ўйнамас шамол.
Лекин энди ичимда яшар,
Бир улуғвор, дилбар Гулжамол.

Ва бесамар курашлар ичра,
Толиққандек жисмим, саботим.
Гарчи худди Тўмарис каби,
От устида ўтди хаётим...

Гоҳ париман, гоҳ паришонман,
Осмондаман ойдек, ҳилолдек.
... Ва ақлимни йиғиб оламан,
Сочларини йиғган аёлдек.

Муаллиф: Гулжамол Асқарова
"Зулфияхоним" мукофоти совриндори, "Қалб таржимони", севимли шоирам

Манба: https://t.me/SHohiraHamro
@Guljamol_Asqarova

👉@Lectora1989👈

🖊️Ҳолат

Тақдир мени енгмоқчидек, қарасам,
Эгик бошим эгмоқчидек, қарасам,
Қалбим яра--тегмоқчидек қарасам,
"Қаддингни тут, чўкма", дедим ўзимга.

Боқсам олам илоҳийдан илоҳий,
Ҳар қадамим хато,  отим--Гуноҳий,
Йўқотганман қаландарлик кулоҳим,
Йиғиларим тиқилади буғзимга.

Разм солсам, доғ ҳаттоки ойда йўқ,
Ҳамма оппоқ, хато кўп, лек қоида йўқ,
Ҳар кетганга куймоқдан ҳеч фойда йўқ,
Кўпам кўз ёш тўкма дедим кўзимга.

Сароб топдим тўрт томондан, излансам,
Нима қилай бахтлилардек кўзлансам?
Таҳрир қилса бўларми, деб юзлансам,
Тарсакисин тортди тақдир юзимга.

Шундан буён келолмайман ўзимга...

✍🏼Гулжамол Асқарова шеъри

https://t.me/SHohiraHamro

Эссиз одам, эй сиз одамлар…

✍🏼Бугун болангизни қучоқлаб табриклайсиз. Эртага-чи?!

Бугун барча эътибор болаларга. Уларга энг ширин сўзларимизни айтамиз, энг яхши тилакларимизни билдирамиз, совғалар улашамиз. Шеърларимизда ҳам, кўрсатувларимизда ҳам, мақолаларимиз ва постларимизда ҳам болаларни бош қаҳрамон қиламиз.

Аммо эртага-чи?

Эртага бу гапларнинг қанчаси эсимизда қолади?

Негадир бу куннинг номидаги энг муҳим сўзларни — “болаларни ҳимоя қилиш” деган маънони кўпинча унутиб қўямиз. Ваҳоланки, байрамнинг асл моҳияти ҳам айнан шу эмасми?

Биз ўзимизга бир саволни беришимиз керак:

Болаларни кимдан ҳимоя қилишимиз лозим?

Ачинарлиси, жавобни узоқдан излаш шарт эмас.

Уларни ўзимизнинг бепарволигимиздан ҳимоя қилишимиз керак.
Тарбия масъулиятини бошқаларга юклаб қўйишдан ҳимоя қилишимиз керак.
Смартфонлар, сериаллар ва виртуал олам оғушида ёлғиз қолиб кетаётган болаликдан ҳимоя қилишимиз керак.
Уларни меҳрсизликдан, эътиборсизликдан, ота-онаси тирик бўла туриб қалбан етим бўлиб қолишдан ҳимоя қилишимиз керак.

Глобал миқёсда эса уларни урушлардан, қуроллардан, катталарнинг ҳирси ва манфаатларидан ҳимоя қилишимиз керак. Бугун дунёнинг қаерларидадир болалар очликдан азоб чекмоқда, қаерларидадир бомба овозидан чўчиб уйғонмоқда, яна қаерларидадир болаликнинг ўзи улардан тортиб олинмоқда.

Шунинг учун ҳам бугун болаларга совға беришдан кўра муҳимроқ бир вазифамиз бор.

Уларга хавфсиз муҳит бериш.
Уларни эшитиш.
Уларни тушуниш.
Уларнинг қалбини асраш.
Уларга, улардан бошқа барчага ажратадиган вақтимиздан кўпроқ ажратиш…

Менимча болаларни бир кунгина эмас, ҳар куни ҳимоя қилиш керак бундай хавфлардан…

Очиғи, бугунги байрам табриклар билан эмас, масъулият билан якунланса, унинг ҳақиқий маъноси рўёбга чиққан бўлади.

Болалар — келажак эмас, улар бугуннинг ўзи… ва уларни қандай асрасак, эртамиз ҳам шундай бўлади.

https://t.me/SHohiraHamro

Олдинда ҳаёт менга қандай тақдирни ҳозирлаб қўйганини билмаган беғубор дамларим… Сиз ҳам болалигингизни соғинасизми?

Бундан кейин фикримдан ўтганларни шу ерга ёзиб бориш қарорига келдим. Анчадан бери мени бир нарса ўйлантиради.

Иш жараёнида хатога йўл қўйсангиз, жавоб берасиз. Вақтида бажарилмаган топшириқ учун танқид эшитасиз. Натижа бўлмаса, сабабини тушунтирасиз. Оқибати оғир бўлса, жазо ҳам оласиз. Буни ҳамма табиий қабул қилади.

Аммо мен бир саволни ўртага ташламоқчиман:

Нега инсоннинг хатоси ҳисоб-китоб қилинади-ю, унинг фидойилиги, меҳнати ва натижаси ҳисобга олинмайди?

Адолат дегани фақат айбдорни топиш эмас, адолат — меҳнат қилганни қадрлаш ҳамдир.

Кимдир мукофот олса, аввало шу саволни беринг: у бу натижа учун қанча меҳнат қилди? Қанча масъулиятни зиммасига олди? Қанча тунларни бедор ўтказди?

Чунки кўпчилик мукофотни кўради, лекин унинг ортидаги машаққатни кўрмайди.

Адолат дегани фақат хато қилганни жазолаш эмас. Адолат — меҳнатни ҳам қадрлашдир.

Шуни унутмайлик: жазо бор жойда рағбат ҳам бўлиши шарт. Акс ҳолда одамлар хатодан қўрқиб ишлайди, лекин ютуқ сари интилиш учун мотивация тополмайди.

https://t.me/SHohiraHamro

🖊️*

Ёмғирлар оралаб ўтади умрим
Баҳордан-баҳорга, кузлардан-кузга.
Ёмғирлар оралаб ўтади умрим
Китобдан-китобга, сўзлардан-сўзга.

Ёмғирлар оралаб ўтади умрим,
Томчилар қўйнида тонгларим отар.
Гоҳ томчи – булбулим, гоҳ томчи – қумрим,
Гоҳ томчи умримга питрадек ботар.

Ёмғирлар оралаб ўтади умрим,
Ўзим ҳам томчиман – фалакдан тушган;
Мен бўрон кўзини очган бир «сим-сим»,
Ёмғирли қанотин силкитган қушман.

Ёмғирлар оралаб ўтади умрим,
Ҳар томчи – бир умр, ўзи бир дунё.
Ёмғирлар оралаб кузатаман жим:
Ювиниб боради аста кир дунё, –

Ёмғирлар оралаб...


✍🏼Абдулла Шер

https://t.me/SHohiraHamro

🖊️ Бугун онам туғилган кун… онагинамни тупроққа қўйган кунимиз ҳам шу кун. Бу куннинг оғриғини юрагимнинг энг чуқур ерида сақлайман. Эс-ақлингни таниганингда бу дарднинг оғриғи ёмон бўлар экан. Ҳамма нарса азоб беради- қилганларинг ҳам, қилолмай қолганларинг ҳам…онасизлик…Бугун туғилган кунлари эди, шу куни тупроққа қўйдик..агар ҳаёт бўлганларида бугун 77 га кирардилар… режаликкина онам, болаларим икки қайта оввора бўлмасин дедиларми? Жойлари жаннатда бўлсин, эсламаган куним йўқ…

https://t.me/SHohiraHamro

🖊️ Карим БАҲРИЕВ

МУНОЖОТ

Ноаён,
Бепоён,
Улкан дунёда
Инсон – бир тўзиган гард каби, э-воҳ.
Миллиард одамларга тўлган дунёда
Ҳеч битта одамни унутма, Аллоҳ.
Кишини ғам билан қолдирма якка,
Ҳеч кимни йўқликнинг қаърига отма.
Номардга – дил бергин, қўл бергин – мардга,
Мени ҳам унутма.

Токим қуёш чиқар ҳар тонг саҳарда,
Коинотда ҳорғин ер кезар токим –
Бу кенг самоларда,
Қаро ерларда
Ўзингсан ҳоким,
Аллоҳим.
Беморга шифо бер, соғларга – умр.
Ёлғизга – йўлдошу, юпунга – тугма.
Очларга – нон бергин, тўқларга – шукур,
Мени ҳам унутма.

Уйсизга – уй қургин, йўлсизга – йўл бер,
Саҳрога – ёмғиру, тоғларга шамол.
Маддоҳ фаҳм топсин, гунгларга тил бер –
Муаттар сўзларни айтсин бемалол.
Борларга – инсоф бер, ғарибга – сабр,
Ботирга – тулпору, олимга – рутба.
Ким ўлса, бер майин тупроқли қабр,
Мени ҳам унутма.

Ёзда нурлар сочгин, қишда қор ёғсин,
Кўкда – бургут, сувда балиқлар оқсин.
Кар қулоқлар ногоҳ очилсин, Аллоҳ,
Кўр кўзлар ярқ этиб оламга боқсин.
Сендан бошқа ҳеч ким бермас беминнат,
Кимдан ҳам тилайлик, воҳ, сендан бошқа –
Шафқатни ҳеч кимдан сен дариғ тутма,
Адашган барчани ҳақ йўлга бошла,
Мени ҳам унутма.

Нафсимни жиловла ва ҳирсни совут,
Руҳимни чархлагин, кўнглимни кенг қил.
Бешикдан тушганнинг тулпори – тобут,
Бизни ҳам азизлар қошида тенг қил.
Биҳишт ариғидан асал сут ичир,
Тириклик гулини асло сўлитма.
Ғофилни кечиргин, ҳаммани – кечир,
Мени ҳам унутма...
Кечир.

✍🏼Карим Баҳриев шеъри
🎤Шоҳира Ҳамро ўқиди

https://t.me/SHohiraHamro

🖊️Ўйлар эдим ҳаёт бизни сийлайди деб,
Биз куйлаган қўшиқларни куйлайди деб.
Бугун бўм-бўш юрагимни сийлаябман,
Ҳаёт қандай айтса шундай куйлаябман.

Ўйлар эдим сўнмас менинг ғурурларим,
Кўксимдаги ҳайратларим, сурурларим.
Бугун қолдим икки ўтнинг озорида,
Йиғлаябман ғуруримнинг мозорида.

Ўйлар эдим дўстларим бор, дил чоғ этар,
Йўлимдаги чоҳларимдан огоҳ этар.
Ё раб бугун бу ўйинда ўзиб чиқдим,
Дўстим ташлаб кетган чоҳдан ўзим чиқдим.

Ўйлар эдим: севган ёрим ташлаб кетмас!
Жондай севар, кўзларимни ёшлаб кетмас!
Ўйлар эдим: мен деб ундай адо йўқдир,
Бугун ундан садо йўқдир, садо йўқдир!

Ўйлар эдим: тоғдек баланд яшайман деб,
Қирчаларга қандоқ назар ташлайман деб.
Тоғдек чўкдим, нелар ларза солди менга?
Бугун тоғлар, қирдек бўлиб қолди менга.

Дунё экан тоғларингни қир қилгувчи!
Дунё экан осмонларинг ер қилгувчи!
Келишмадим тоши ёлғон савдо билан,
Она-бола бўлолмадим дунё билан!

Дунё экан...Дунё экан...Ай дунё-я

✍️Гулжамол Асқарова
🎤Шоҳира Ҳамро ўқиди

https://t.me/SHohiraHamro