Суперлиганинг сўнгги ўн йилдаги энг яхши легионери
Ўзбекистон чемпионатига камдан-кам ҳолларда сифатли легионерлар ташриф буюради. Лиганинг сўнгги йигирма йилликдаги энг яхши легионерлари ҳақида гап кетганда, Ривалдо, Драган Черан, Артур Геворкян ва бошқалар хаёлга келади. Ана шундай сифатли легионерлардан бири — Люпчо Дориев. Ушбу мақолада ҳужумчининг профессионал фаолияти ҳақида сўз юритамиз.
Люпчо Дориев 1995 йил 13 сентябрда Македониянинг Струмица шаҳрида таваллуд топган. Люпчо ёшлигидан футболга меҳр қўйган бўлиб, Пандев академиясида футбол сабоқларини ўрганишни бошлайди.
У профессионал фаолиятини 2014 йилда Македониянинг «Брера Струмица» клуби билан бошлайди. Кейинчалик Македониянинг бир қатор маҳаллий клубларидаги барқарор фаолиятидан сўнг «Шкендия» клуби уни 70 минг евро эвазига ўз сафига қўшиб олади. Ҳужумчи ушбу клуб сафида 75 бор майдонга тушиб, 27 та голга муаллифлик қилган.
2023 йилда эса Люпчо Дориев Ўзбекистонга кўчиб ўтади. «Сўғдиёна» уни эркин агент сифатида ўз сафига қўшиб олади. У «Сўғдиёна» сафида 84 та учрашувда майдонга тушиб, рақиблар дарвозасини 45 бор ишғол қилган. Эътиборлиси шундаки, Дориев Ўзбекистонга келганидан сўнг Суперлигада ундан кўп гол урган футболчи бўлмаган.
Люпчо ўтган мавсумда Суперлигадаги муҳим голлари орқали лиганинг энг яхши хорижлик футболчиси деб эълон қилинган. Ҳозирда унинг Transfermarkt'даги трансфер баҳоси 1,1 миллион еврони ташкил этмоқда. Шунингдек, футболчининг «Сўғдиёна» клуби билан шартномаси 2030 йилгача амал қилади.
Бу йилги мавсумда ҳужумчи рақиблар дарвозасини 14 бор ишғол қилиб, тўпурарлар пойгасида пешқадамлик қилмоқда. Македониядан Ўзбекистонга келган Люпчо Дориев бугунги кунда Суперлиганинг энг сермаҳсул ҳужумчиларидан бирига айланди.
Энди эса асосий савол — у бу натижаларини яна қанча вақт давом эттира олади? Бир нарса аниқ: Дориев аллақачон Суперлиганинг энг яхши легионерлари қаторидан жой олиш учун муҳим марраларни забт этди.
✍️ Абдуғаффоров Саййид Абдуллоҳ.
1/2
