Bankxabar

КРЕДИТНИ МУДДАТИДАН ОЛДИН ЁПГАНДА СУҒУРТА ПУЛИНИ ҚАЙТАРИШ ШАРТЛАРИ, ҚАЙТАРИЛАДИГАН СУММА, МУРОЖААТ ҚИЛИШ ТАРТИБИ

Кўпчилик банкдан кредит олаётганда суғурта учун ҳам пул тўлайди. Айримлар кредитни белгиланган муддатдан анча олдин ёпади, аммо фойдаланилмаган давр учун тўланган суғурта пулини қайтариб олиш мумкинлигини билмайди. Аслида қонунчиликда бундай имконият бор. Лекин кредитнинг муддатидан олдин ёпилиши суғурта пули ҳар доим қайтарилади дегани эмас.

☑️ Фуқаролик кодексининг 948-моддасига кўра, суғурта шартномаси кучга кирганидан кейин суғурта ҳодисаси юз бериш эҳтимоли йўқолса ва суғурта хавфи бошқа сабаблар билан тугаса, шартнома муддатидан олдин бекор бўлади.
▪️Бундай ҳолатда суғурта компанияси фақат суғурта амал қилган даврга мутаносиб мукофотни ўзида олиб қолиш ҳуқуқига эга. Қолган қисмни қайтариш учун ҳуқуқий асос юзага келади.
▪️Масалан, фуқаро 3 йиллик кредит олиб, суғурта учун 3 миллион сўм тўлади. Кредитни эса 1 йилда тўлиқ ёпди. Агар суғурта хавфи ҳам тугаган бўлса, оддий мутаносиб ҳисоб-китоб бўйича қолган 2 йил учун 2 миллион сўм қайтарилиши мумкин. Бу шартли мисол. Аниқ сумма суғурта муддати, шартнома шартлари ва суғурта хавфининг қачон тугаганига қараб ҳисобланади.

❓Қайси ҳолатда суғурта пули қайтарилмаслиги мумкин?
☑️ Агар кредит ёпилган бўлса-да, суғурта хавфи сақланиб қолса, пулни қайтариш мажбурияти автоматик юзага келмайди. Масалан, автомашинанинг шикастланиши ёки йўқолиши хавфи кредит ёпилганидан кейин ҳам мавжуд бўлиши мумкин. Шунингдек, фуқаро суғурта шартномасидан ўз хоҳиши билан воз кечса, шартномада бошқача қоида белгиланмаган бўлса, суғурта мукофоти қайтарилмайди.

☑️ Суғурта пулини қайтариб олиш тартиби:
▪️Биринчи қадам. Кредит олган банкингиздан қарздорлик тўлиқ сўндирилгани ҳақида маълумотнома олинг.
▪️Иккинчи қадам. Суғурта полисини текшириб, қайси суғурта компанияси билан шартнома тузилганини аниқланг.
▪️Учинчи қадам. Суғурта компаниясига шартномани муддатидан олдин бекор қилиш ва фойдаланилмаган давр учун суғурта мукофотини қайтариш ҳақида ёзма ариза беринг.
▪️Тўртинчи қадам. Аризага паспорт ёки ID-карта маълумотлари, суғурта полиси, кредит ёпилганлиги ҳақидаги банк маълумотномаси, зарур бўлса тўлов ҳужжати ва пул қайтариладиган ҳисобварақ реквизитларини илова қилинг. Аризангиз қабул қилинганини тасдиқловчи ҳужжат ёки рўйхат рақамини сақлаб қўйинг. Қайтариладиган сумма бўйича ёзма ҳисоб-китоб талаб қилинг.

☝️Агар суғурта шартномаси банк томонидан тузилган бўлса, аввал банкдан шартнома иштирокчилари ва пулни қайтариш тартибини аниқлаштириш лозим. Бу масала «Суғурта фаолияти тўғрисида»ги Қонуннинг 32-моддаси билан ҳам боғлиқ.

❓Суғурта пули қанча вақтда қайтарилади?
☑️ Фуқаролик кодексининг 948-моддасида пулни айнан 5, 10 ёки 15 кун ичида қайтариш бўйича умумий муддат белгиланмаган. Шунинг учун тўлов муддати суғурта шартномаси ва тегишли суғурта қоидалари асосида аниқланади.

❓Суғурта компанияси пулни қайтармаса, кимга мурожаат қилинади?
☑️ Агар мурожаатингиз рад этилса ёки асоссиз равишда маблағ қайтарилмаса, қуйидаги ташкилотларга шикоят қилишингиз мумкин.
▪️Истиқболли лойиҳалар миллий агентлиги — суғурта соҳасини тартибга солувчи ваколатли орган. «Суғурта фаолияти тўғрисида»ги Қонуннинг 64-моддаси суғурта хизматлари истеъмолчиларининг ҳуқуқларини ҳимоя қилишни назарда тутади.
📞 71-231-18-40 — суғурта соҳасидаги мурожаатлар учун.
▪️Рақобат қўмитаси — истеъмолчилар ҳуқуқлари бузилганда мурожаат қилиш мумкин бўлган ташкилот.
📞1159 — Рақобат қўмитасининг қисқа алоқа рақами.

▪️Шунингдек, «Истеъмолчиларнинг ҳуқуқларини ҳимоя қилиш тўғрисида»ги Қонуннинг 21-моддасига асосан, истеъмолчининг қонунчиликда белгиланган ҳуқуқларини чеклайдиган шартнома шартлари ҳақиқий эмас ҳисобланади. Зарур ҳолларда суд орқали ҳам ўз ҳуқуқларингизни ҳимоя қилишингиз мумкин.

☑️ Рақобат қўмитасининг 2026 йил 3 апрелдаги маълумотига кўра, Жиззах вилоятидаги фуқаро 60 миллион сўмлик микроқарзини суғурталаш учун 3 миллион сўм тўлаган. Кредитни муддатидан олдин ёпганидан кейин суғурта пули қайтарилмаган. Фуқаронинг мурожаати ўрганилиб, суғурта компанияси томонидан 2,1 миллион сўм унинг банк картасига қайтарилиши таъминланган. Демак, бундай пулларни қайтариб олиш амалиёти ҳам мавжуд.

Каналга уланиш👉🏻 @Bankxabar

Андижондаги паррандачилик фабрикаси Афғонистон ва Қирғизистонга маҳсулот экспорт қилмоқда

Андижондаги «Барака Ҳамкор Парранда» корхонаси 2012 йилда кичик оилавий хўжалик сифатида иш бошлаган. Бугун маҳсулотини Афғонистон ва Қирғизистонга ҳам экспорт қилмоқда.

Корхона Тадбиркорликни ривожлантириш компанияси кўмагида фаолиятини кенгайтирган. Инкубациядан «Ҳалол» стандарти асосидаги қушхонагача бўлган тўлиқ ишлаб чиқариш занжири яратилган, энергия тежовчи технологиялар жорий этилган.

Ҳудудларда тадбиркорлик ривожи, аввало, шундай натижаларда кўринади: иш ўрни, ишлаб чиқариш ва экспорт.

Кичик хўжалик бу даражага қандай етди? «Бир қадам» лойиҳасининг навбатдаги сони шу ҳақда.

👍 Тўлиқ видеони кўриш: https://youtu.be/6HyJJHl9pRI

Каналга уланиш👉🏻 @Bankxabar

Кредит тарихи қачон яхшиланади, салбий маълумотлар қанча вақт сақланади ва қайта кредит олиш учун нима қилиш кераклиги ҳақида муҳим маълумотлар

Кредит тўловини кечиктириб, кредит тарихи ёмонлашган фуқаролар орасида қарзни тўлиқ ёпгандан кейин яна қанча вақт ўтиб кредит олиш мумкинлиги ҳақида турли тушунчалар бор. Айримлар 6 ой кутиш керак деса, бошқалар 5 йил давомида банклар кредит бермайди деб ўйлайди. Аслида Ўзбекистон қонунчилигида кредит тарихи ёмонлашган фуқаро айнан 3 ой, 6 ой ёки 5 йилдан кейин кредит олиши мумкин деган умумий чеклов белгиланмаган. Фуқаро муддати ўтган қарздорлигини бартараф этгандан кейин банкка қайта мурожаат қилиши мумкин. Лекин бу кредит албатта ажратилади дегани эмас.

☑️ Кредит ёпилгандан кейин кредит тарихи янгиланади, аммо аввалги кечикишлар сақланиб қолади. Марказий банкнинг 3646-сонли низоми 9-бандига мувофиқ, банклар кредит ахборотини қайд этилгандан кейин реал вақт режимида кредит бюроларига, кейинги иш кунидан кечиктирмасдан эса Кредит реестрига юбориши шарт.

☝️Демак, фуқаро муддати ўтган қарзини тўласа ёки кредитини тўлиқ ёпса, бу ҳақдаги маълумот кредит тарихида акс эттирилади. Аммо қарз ёпилиши билан кредит тарихи автоматик равишда ижобийга ўзгармайди. Аввалги кечикишлар скоринг баҳосига таъсир қилишда давом этиши мумкин.

☑️ Кредит тарихи ижобийга ўзгариши учун аниқ белгиланган муддат йўқ. Кредит тарихи бир ойда ҳам яхшиланиши мумкин, айрим ҳолларда эса бунинг учун анча кўпроқ вақт талаб этилади. Ҳаммаси аввалги кечикишларнинг давомийлиги, қарз миқдори, мавжуд кредитлар ва кейинги тўлов интизомига боғлиқ.

▪️КАТМ кредит бюросида скоринг балли 0 дан 500 гача баҳоланади. Скоринг маълумотлари мунтазам янгиланади, бироқ бу балл ҳар куни албатта ошади дегани эмас.
▪️Масалан, фуқаро 2026 йил октябрда 90 кун кечиктирган кредитини тўлиқ ёпди. Унинг қарздорлиги тугатилгани кредит тарихида акс этади, лекин 90 кунлик кечикиш ҳақидаги маълумот сақланиб қолади. Кейинги даврда тўлов интизоми яхшиланса, скоринг балли ҳам аста-секин ошиши мумкин.

☝️Бироқ кредит тарихи айнан 3 ёки 6 ойдан кейин ижобий тоифага ўтиши кафолатланмайди.

☑️ Кредит тарихидаги салбий маълумотлар учун қонунчиликда 5 йиллик муддат назарда тутилган. «Кредит ахбороти алмашинуви тўғрисида»ги ЎРҚ–301-сонли қонуннинг 5-моддасига мувофиқ, пул суммасини тўлаш мажбурияти бажарилган санадан бошлаб 5 йилдан кўп вақт ўтган маълумотлар кредит тарихига киритилмайди.

☑️ Шунингдек, 3646-сонли низомнинг 20-банди кредит бюролари охирги беш йиллик ижобий ва салбий кредит маълумотлари асосида кредит тарихини шакллантиришини назарда тутади. Муҳими, 5 йил кредит олиш тақиқланган муддат эмас. Фуқаро бу муддат тугамасидан ҳам банкнинг талабларига жавоб берса, кредит олиши мумкин.

☑️ Кредит тарихини яхшилашнинг асосий йўли тўлов интизомини тиклаш ҳисобланади. Бунинг учун муддати ўтган қарздорликни бартараф этиш, амалдаги кредитларни белгиланган график бўйича тўлаш ва қарз юкини камайтириш зарур. Чунки банклар кредит ажратишда нафақат аввалги кечикишларга, балки фуқаронинг ҳозирги даромади, мавжуд қарзлари ва тўлов қобилиятига ҳам эътибор қаратади.

Каналга уланиш👉🏻 @Bankxabar

Кредит тўлиқ тўланганидан кейин банк гаровни 3 иш кунида ечмаса, 7,5 млн сўм жаримага тортилиши мумкин

Кредит олиш учун уй, автомобиль ёки бошқа мол-мулкни гаровга қўйган фуқаролар кўп. Аммо кредит тўлиқ ёпилганидан кейин ҳам айрим ҳолларда мулк гаровда қолиб кетади. Аслида банк гаровни ечишни хоҳлаганича чўзиб юриши мумкин эмас. Бунинг аниқ муддати, ҳатто талабни бузганлик учун жарима ҳам белгиланган.

☑️ Марказий банкнинг 3030-сонли низоми 37⁴-бандига мувофиқ, кредит бўйича қарздорликни тўлаш мажбурияти тўлиқ бажарилган санадан бошлаб банк 3 иш кунидан кечиктирмасдан гаровдаги мулкни тақиқдан чиқариши, шунингдек гаров реестридан банкнинг ушбу мулкка нисбатан ҳуқуқлари тўғрисидаги ёзувни чиқариш чораларини кўриши шарт. Энг муҳими, банк бу муддатни бузса, молиявий жавобгарлик ҳам бор.

☑️ Адлия вазирлигида 3492-сон билан рўйхатдан ўтказилган низом иловасининг 2.27-позициясига кўра, кредит тўлиқ қайтарилганидан кейин гаровдаги мулк белгиланган муддатдан кечиктириб тақиқдан чиқарилса ёки гаров реестридаги тегишли ёзув кечиктириб ўчирилса, банкка ҳар бир ҳолат учун 7,5 млн сўм жарима қўлланилиши назарда тутилган.

☝️Агар бундай қоидабузарликлар 100 тадан ортиқ бўлса, жарима банк жами капиталининг 0,01 фоизи миқдорида, бироқ 750 млн сўмдан кам бўлмаган миқдорда белгиланади. Микромолия ташкилотлари учун эса ҳар бир ҳолатга 3 млн сўм жарима назарда тутилган.

☑️ Бундан ташқари, «Гаров тўғрисида»ги қонуннинг 32-моддасига асосан, гаров билан таъминланган мажбурият бекор бўлганда гаров ҳам бекор бўлади. Яъни кредит бўйича барча мажбуриятлар бажарилганидан кейин банкнинг ушбу кредитни таъминлаш учун мулкни гаровда сақлаб туришига асос қолмайди.

☑️ Банкнинг кечикиши туфайли мижоз зарар кўрса, уни қоплатишни ҳам талаб қилиши мумкин. Масалан, мулкини сотиш бўйича келишув амалга ошмай қолса ва бунинг оқибатида моддий зарар етса, Фуқаролик кодексининг 14-моддасига асосан зарарни қоплаш масаласини судда кўтариш мумкин. Бунда зарар миқдори ва унинг банк ҳаракатсизлиги билан боғлиқлиги исботланиши керак.

☝️Шу ўринда бир жиҳатни тушуниш лозим. 7,5 млн сўм жарима мижозга тўлаб берилмайди. Бу банкка нисбатан қўлланиладиган санкция. Мижозга етказилган зарарни қоплаш эса алоҳида ҳуқуқий масала ҳисобланади.

Агар кредитингиз тўлиқ ёпилган бўлса-ю, банк 3 иш куни ичида мулкингизни гаровдан чиқармаса, аввало банкка мурожаат қилинг. Масала ҳал этилмаса, Марказий банкнинг 1800 қисқа рақамли Алоқа марказига қўнғироқ қилиб, шикоят қолдиринг.

Каналга уланиш👉🏻 @Bankxabar

КРЕДИТ ҚАРЗИ БОР ФУҚАРОЛАРНИНГ ЧЕТ ЭЛГА ЧИҚИШИ ҚАЙСИ ҲОЛЛАРДА ТАҚИҚЛАНАДИ?

Банкдан кредит олган фуқаронинг қарзи бўлса ёки ойлик тўловини кечиктирса, бу унинг чет элга чиқиши автоматик равишда тақиқланади дегани эмас. Ҳатто банк кредитни ундириш учун судга мурожаат қилган бўлса ҳам, бунинг ўзи чет элга чиқишни чеклаш учун етарли эмас. Қонунчиликда бундай чеклов қўйишнинг аниқ тартиби белгиланган.

👉 «Суд ҳужжатлари ва бошқа органлар ҳужжатларини ижро этиш тўғрисида»ги Қонуннинг 42¹-моддасига кўра, суд ҳужжати асосида берилган ижро ҳужжатидаги талаблар қарздор томонидан белгиланган муддатда узрсиз сабабларга кўра бажарилмаса, давлат ижрочиси унинг Ўзбекистондан чиқишини вақтинча чеклаш тўғрисида қарор чиқаришга ҳақли.

❓Бу жараён қандай амалга оширилади?
☑️ Биринчидан, банк кредит қарзини ундириш учун судга мурожаат қилиши ва тегишли суд ҳужжати ижрога қаратилиши мумкин. МИБда ижро иши қўзғатилгач, қарздорга қарзни ихтиёрий тўлаш учун муддат берилади. Бу муддат 15 кундан ошмаслиги керак.
☑️ Иккинчидан, қарздор белгиланган муддатда узрсиз сабабларга кўра ижро ҳужжати талабларини бажармаса, давлат ижрочиси банкнинг аризаси ёки ўз ташаббуси билан чет элга чиқишни вақтинча чеклаш ҳақида қарор чиқариши мумкин.
☑️ Учинчидан, ушбу қарор катта давлат ижрочиси томонидан тасдиқланади. Шундан сўнг маълумотлар миграция органлари ва ДХХ Чегара қўшинларига юборилади. Натижада фуқаро чегарадан ўтаётганда Ўзбекистондан чиқишига рухсат берилмаслиги мумкин.

☝️Бу тартиб Адлия вазирлигида 2019 йил 12 ноябрда 3196-сон билан рўйхатдан ўтказилган Низомнинг 5–10-бандларида белгиланган.

❓Қайси ҳолларда чет элга чиқиш чекланмайди?
☑️ Мазкур Низомнинг 3-бандига асосан, ижро ишини қўзғатиш тўғрисида қарор қабул қилинган кунда ундириладиган сумма базавий ҳисоблаш миқдорининг 5 бараваридан ошмаса, чет элга чиқиш чекланмайди. Алимент ва бошқа даврий тўловлар бундан мустасно.

☑️ Шунингдек, суд қарорини бажариш учун етарли мол-мулк олиб қўйилган бўлса, мазкур чеклов қўлланилмайди.

❓Қарз тўлангандан кейин тақиқ қачон олиб ташланади?
☑️ Қонуннинг 42¹-моддасига мувофиқ, чекловга асос бўлган ижро ҳужжати талаблари бажарилганда ёки ижро иши қонунда белгиланган асосларда тугатилганда ёхуд тамомланганда, давлат ижрочиси кейинги кундан кечиктирмасдан чеклов олиб ташлангани ҳақида тегишли органларни хабардор қилиши шарт.

❓Чет элга чиқишга тақиқ бор-йўқлигини қандай билиш мумкин?
☑️ Фуқаролар my.gov.uz порталидаги махсус хизмат орқали ижро ҳужжатлари бўйича қарздорлик сабабли Ўзбекистондан чиқишга вақтинча чеклов қўйилган ёки қўйилмаганини бепул текшириши мумкин.

Каналга уланиш👉🏻 @Bankxabar

🏦 Hamkorbank Ўзбекистон бўйлаб бир қатор лавозимларга ишга таклиф қилмоқда

Банк соҳасида ишлашни режалаштираётган ёки янги иш имкониятларини излаётганлар учун яхши янгилик. Hamkorbank республика бўйлаб бир қатор бўш иш ўринларига номзодларни қабул қилмоқда.

☑️ Банкда ҳозирда ҳуқуқшунос, ундирувчи, иш ўрганувчи, кассир, хўжалик хизмати ходими, ҳайдовчи ва офис менежери лавозимлари бўйича бўш иш ўринлари мавжуд.

▪️Номзодларга қўйиладиган талаблар танланган лавозимга қараб белгиланади. Асосий эътибор масъулиятли бўлиш, жамоада ишлай олиш ва ўз вазифаларини сифатли бажаришга қаратилади.

👉 Hamkorbank'га резюме юбориш

👍Каналга уланиш👉🏻 @Bankxabar

КОНТРАКТ ТЎЛОВИ 1 НОЯБРГАЧА УЗАЙТИРИЛДИ, ТАЛАБАЛАР УЧУН ТАЪЛИМ КРЕДИТИ ВА БАРЧА ИМТИЁЗЛАРНИ БИТТА ПОСТДА ЖАМЛАДИК

Талабалар ва уларнинг ота-оналари учун яхши янгилик. 2026/2027 ўқув йили учун контракт тўловларини амалга ошириш муддати 1 ноябргача, шу куни ҳам узайтирилди. Бу ҳақда Олий таълим, фан ва инновациялар вазирлиги расман хабар берди. Янги муддат бакалавриат ва магистратурага ўқишга тавсия этилган абитуриентлар, ўқиши кўчирилган, кўчириб тикланган ҳамда ўқишга қайта тикланган талабаларга тааллуқли.

1 ноябрга қадар оддий контрактнинг йиллик суммасидан камида 25 фоизи, супер-контрактнинг эса камида 50 фоизи тўланиши керак. Масалан, йиллик контракт 12 млн сўм бўлса, ҳозирча 3 млн сўм, супер-контракт 60 млн сўм бўлса, камида 30 млн сўм тўлаш талаб этилади. Контракт тўлаш учун 14 фоизли таълим кредити, супер-контракт учун тижорий кредитлар, педагоглар фарзандларига 30 фоизлик чегирма ва 12 фоизлик солиқ имтиёзи мавжуд. Шунингдек, ётоқхона, ижара компенсацияси ва бошқа хизматларни ҳам онлайн расмийлаштириш мумкин. Қуйида ҳаммасини ҳаволалари билан жамладик.

☑️ Оддий контракт учун 14 фоизли имтиёзли таълим кредити олиш мумкин. Ушбу кредит Ўзбекистондаги давлат, хусусий ва хорижий ОТМлар ҳамда уларнинг Ўзбекистондаги филиалларида кундузги таълим шаклида контракт асосида ўқиётган Ўзбекистон фуқароларига берилади.
▪️1-курс талабалари контракт суммасининг 100 фоизигача кредит олиши мумкин. 2-курс ва ундан юқори босқичда GPA кўрсаткичи 3,0 дан паст бўлса, контрактнинг кўпи билан 80 фоизи кредит ҳисобидан қопланади, қолган 20 фоизи олдиндан тўланади. GPA 3,0 ва ундан юқори бўлса, 100 фоизигача кредит ажратилади. Ижтимоий ҳимоя реестрига киритилган оилалар фарзандлари учун алоҳида имтиёзлар мавжуд.
▪️Йигитлар учун йиллик ставка 14 фоиз, хотин-қизлар учун эса кредит фоизлари давлат маблағлари ҳисобидан қопланади. Асосий қарзни қайтариш ўқиш тугаганидан кейинги еттинчи ойдан бошланиб, 7 йил давом этади. Йигитлар эса фоиз тўловларини кредит ажратилганидан бошлаб амалга оширади. Бу тартиблар Президентнинг ПФ–82-сон фармони ва Вазирлар Маҳкамасининг 527-сон қарори билан белгиланган.

☑️ Таълим кредити учун банкка бориш шарт эмас, камида 5 та банк мобил илова орқали ариза топшириш имкониятини яратган.
🏦 Асакабанк — Asakabank мобил иловасида таълим кредитига онлайн ариза топшириш мумкин. Кредит йиллик 14 фоиз ставкада, ўқиш даврига қўшимча 7,5 йилгача муддатга ажратилади. Асосий қарз бўйича имтиёзли давр ўқиш даври + 6 ойни ташкил этади. ☎️ 1152
🏦 BRB — BRB мобил иловаси орқали таълим кредитига онлайн ариза топширилади. Хотин-қизларнинг фоиз тўловлари давлат томонидан қопланади, йигитлар учун ставка 14 фоиз.
🏦 Халқ банки — Таълим кредити платформасида Халқ банки танланади ва жараён xazna мобил иловаси орқали давом эттирилади.
🏦 МКБанк — Mavrid мобил иловаси орқали таълим кредитига онлайн ариза топшириш мумкин.
🏦 Агробанк — Agrobank Mobile иловаси орқали кредитга масофадан ариза юбориш ва унинг ҳолатини кузатиб бориш имконияти мавжуд.

▪️Бундан ташқари, Асакабанк, Ўзмиллийбанк, Hamkorbank, BRB, Туронбанк, Алоқабанк, Агробанк, Халқ банки, МКБанк, ЎзСҚБ ва Ориент Финанс Банк каби банклар орқали имтиёзли таълим кредити олиш мумкин. Аризани банк иловасидан ташқари my.gov.uz ёки Таълим кредити ахборот тизими орқали ҳам юбориш мумкин. Муҳими, ариза топшириш кредит автоматик тасдиқланади дегани эмас. Давлат дастуридаги аризалар 5 иш кунида кўриб чиқилиши белгиланган. Шунинг учун 1 ноябрни кутиб ўтирмасдан, ҳозирдан ариза топширган маъқул.

☑️ Супер-контракт учун ҳам кредит олиш мумкин, лекин шартлар бошқача. Супер-контракт одатда давлат дастуридаги 14 фоизли таълим кредити орқали эмас, банкларнинг ўз маблағлари ҳисобидан ажратиладиган тижорий таълим кредитлари орқали молиялаштирилади.
🏦 Ўзмиллийбанк — бакалавриат талабаларига 36 ойгача йиллик 22 фоиз, 60 ойгача йиллик 24 фоиз ставкада кредит таклиф қилади. 12 ойгача имтиёзли давр мавжуд. Магистратура учун 36 ойгача йиллик 22 фоиз ставка қўлланади. ☎️ 1344
🏦 Бизнесни ривожлантириш банки — «Таълим орзуси» кредити 2 млн сўмдан 100 млн сўмгача ажратилади. 2 йилга ставка 27 фоиз, 4 йилга 28 фоиз. Имтиёзли давр мавжуд эмас. ☎️ 1254
🏦 Алоқабанк — таълим учун тижорий кредит 100 млн сўмгача, 60 ойгача муддатга йиллик 25 фоиз ставкада берилади. Имтиёзли давр мавжуд эмас. ☎️ 71-230-77-77
🏦 Ориент Финанс Банк — таълим учун истеъмол кредити 250 млн сўмгача, 48 ойгача муддатга ажратилади. Таълим қийматининг камида 50 фоизи ўз маблағидан тўланган бўлса, ставка 25 фоиз, 50 фоиздан кам қисми тўланган бўлса, 28 фоиз бўлади. ☎️ 4004

☑️ Хорижда ўқиш учун ҳам алоҳида имтиёзли таълим кредити мавжуд. Вазирлар Маҳкамасининг 2026 йил 2 мартдаги 88-сон қарори асосида QS ёки THE халқаро рейтингларининг TOP–300 талигига кирган хорижий университетларда бакалавриат ёки магистратурада ўқиш учун бир ўқув йилига 20 минг АҚШ долларигача эквивалентда сўмда кредит ажратилади. Мазкур имконият белгиланган талабларга жавоб берадиган 30 ёшгача бўлган, шу жумладан 30 ёшдаги ёшлар ва педагог ходимлар учун назарда тутилган.
🏦 Асакабанк — хорижда таълим олиш учун 20 минг АҚШ доллари эквивалентигача, Марказий банкнинг асосий ставкаси миқдорида кредит таклиф қилади. ☎️ 1152
🏦 Hamkorbank — хорижда ўқиш учун йилига 20 минг АҚШ долларигача эквивалентда, 14 фоиз ставкада кредит таклиф қилади. ☎️ 1256
🏦 Халқ банки — «Таълим TOP–300» кредити орқали 20 минг АҚШ долларигача эквивалентда, Марказий банкнинг асосий ставкаси миқдорида таълим кредити ажратади.

☑️ Педагогларнинг фарзандлари учун контракт суммасининг 30 фоизини давлат қоплаб беради. Вазирлар Маҳкамасининг 2026 йил 17 сентябрдаги 501-сон қарори билан давлат ОТМларида бакалавриатнинг кундузги таълим шаклида, базавий контракт асосида ўқиётган педагоглар фарзандларига ушбу имтиёз жорий қилинди. Масалан, йиллик контракт 15 млн сўм бўлса, унинг 4,5 млн сўмини давлат қоплайди, ота-она эса 10,5 млн сўм тўлайди. Педагогнинг бир нечта фарзанди давлат ОТМида контракт асосида ўқиса, имтиёз ҳар бирига алоҳида қўлланилади. Бунинг учун kontrakt.edu.uz орқали ариза юборилади. Маълумотлар тасдиқлангач, 30 фоизлик чегирма қўлланилади.
▪️Яна бир муҳим янгилик, контрактни олдиндан қисман ёки тўлиқ тўлаб қўйганлар ҳам 30 фоизлик чегирмадан фойдаланиши мумкин. Буни вазирлик 15 октябрдаги расмий тушунтиришида тасдиқлади. Ярим грант, ярим контракт асосида ўқиётган талабалар ҳам белгиланган шартларда имтиёздан фойдаланиши мумкин. Бироқ 30 фоизлик имтиёз супер-контрактга, нодавлат ва хорижий ОТМларга, қўшма таълим дастурларига ҳамда ҳарбийлаштирилган олий таълим ташкилотларига татбиқ этилмайди.

☑️ Контракт учун сарфланган маблағ бўйича 12 фоизлик даромад солиғи имтиёзидан ҳам фойдаланиш мумкин. Солиқ кодексининг 378-моддаси 16-бандига мувофиқ, белгиланган шартларда ўзининг, фарзандининг ёки 26 ёшга тўлмаган турмуш ўртоғининг ўқиши учун йўналтирилган даромадларига жисмоний шахслардан олинадиган даромад солиғи солинмайди. Масалан, фарзандингизнинг контракти учун 10,5 млн сўм тўланган бўлса, шартлар бажарилганда 1 млн 260 минг сўмгача даромад солиғи бўйича имтиёздан фойдаланиш мумкин. Бунинг учун тегишли миқдорда солиққа тортиладиган даромад бўлиши керак. Шунингдек, таълим кредитини, жумладан унинг фоизларини қайтаришга йўналтирилган даромадларга ҳам имтиёз татбиқ этилади. Аризани my3.soliq.uz ёки Soliq мобил иловаси орқали юбориш мумкин. Батафсил тартиб.

☑️ Талабаларга керак бўладиган бошқа хизматларни ҳам телефондан туриб ҳал қилиш мумкин:
▪️my.gov.uz орқали ётоқхонага ариза бериш;
▪️ётоқхона навбатини текшириш;
▪️контракт шартномасини электрон олиш;
▪️ижара компенсацияси учун ариза бериш;
▪️ижара тўловлари ҳақида маълумот олиш;
▪️стипендияни текшириш, давлат стипендиялари ҳақида маълумот олиш;
▪️ўқиш жойидан маълумотнома олиш мумкин.

Ушбу давлат хизматлари бепул бўлиб, аксарияти учун ОТМга бориб навбат кутишга ҳожат йўқ. Айрим хизматлардан фойдаланиш учун OneID орқали шахсий кабинетга кириш талаб этилади.

👍Каналга уланиш👉🏻 @Bankxabar

🏦 Халқ банки агенти бўлинг — банк хизматларидан даромад олинг

Банк агентлик тизими доирасида тадбиркорлар ва ўзини ўзи банд қилган шахслар мижозларга банк хизматларини кўрсатиб, ҳар бир операция учун комиссион ҳақ олиш имконига эга бўлади.
☑️ Комиссион ҳақ:
— карта тўлдириш ва нақд пул бериш суммасидан 0,5%;
— ипотека кредитлари бўйича 0,6%гача.

☑️ Агент бўла оладиганлар:
— юридик шахслар (банкда депозит ҳисобварағи билан) — тўловларни қабул қилиш, карта тўлдириш ва нақд пул бериш, карта сотиш, кредит маҳсулотларини таклиф қилиш;
— ўзини ўзи банд қилган жисмоний шахслар — карта сотиш ва ипотека кредитларини таклиф қилиш.

👉 Платформада рўйхатдан ўтиш

👍Каналга уланиш: @Bankxabar