MIB XORAZM FAOLIYATIDAN

Суд ажримига асосан қурилиш-монтаж ишлари тўхтатилди

Жорий йилнинг 19 октябрь куни “EFFECT.UZ” расмий сайти орқали “Президент сиёсатига қаршимисиз?” – Урганчда “Яшил макон” учун ажратилган ерда иссиқхона қурилди ҳамда “Суд қарори менсимаяптими?” ҳақидаги хабарлар тарқалди.

Ушбу хабар юзасидан Мажбурий ижро бюросининг Хоразм вилояти бошқармаси қуйидагиларни маълум қилади.

Фуқаролик ишлари бўйича Урганч туманлараро судининг “даъвони таъминлаш чорасини қўллаш тўғрисида”ги ажримига асосан мазкур фуқаролик иши мазмунан кўриб чиқилгунига қадар жавобгар Урганч шаҳар, “Оби ҳаёт” МФЙ, Ж.Мангуберди кўчаси 95/6-уйда жойлашган Урганч шаҳар ободонлаштириш бошқармаси томонидан Урганч шаҳар, “Оби ҳаёт” МФЙ, Ж.Мангуберди кўчаси манзилида бажарилаётган қурилиш-монтаж ишларини вақтинчалик тўхтатиб туриш тўғрисидаги ижро ҳужжати Бюронинг Урганч шаҳар бўлими иш юритувига келиб тушган ва ижро ҳаракатларига киришилган.

Суд ажрими ижросини таъминлаш мақсадида жорий йилнинг 19 октябрь куни бўлим давлат ижрочилари томонидан ажримда кўрсатилган манзилга борилиб, жавобгар вакилларига суд ажрими ўқиб эшиттирилган ва қурилиш-монтаж ишлари вақтинчалик тўхтатилиб, даъвогар Ж.С. ва холислар иштирокида далолатнома расмийлаштирилган.

Мазкур фуқаролик иши судда кўриб чиқилаётганлиги сабабли, суднинг якуний қарорига асосан ижро ҳаракатлари амалга оширилиши маълум қилинади.

Хоразмда ҳамкорликда Autocon тадбирлари ўтказилмоқда
https://youtube.com/watch?v=XYUViEgMNLo&si=vdv_scx9aKEiiRie

Қидирувда бўлган қарздор ота топилди ва 15 суткага қамалди

Алимент ундируви билан боғлиқ ижро ҳужжатлари ижросини таъминлаш юзасидан, алимент тўлашдан бўйин товлаб, қидирувда юрган шахсларнинг аниқлаш борасида тизимли ишлар олиб борилиб, уларнинг иш ҳужжатлари судларга ўтказилиб, тегишли чоралар кўрилмоқда.

Мажбурий ижро бюросининг Урганч тумани бўлими иш юритувида бўлган қарздор Н.Ш. фуқаролик ишлари бўйича Урганч туманлараро судининг 13.01.2016 йилдаги суд буйруғига асосан ундирувчи Ш.И. фойдасига бир нафар фарзандининг моддий таъминоти учун алимент пулини тўлаб бориши белгиланган бўлса-да, у белгиланган алимент пулларини ўз вақтида тўламасдан келган.

Натижада, 01.10.2026 йил ҳолатига алиментдан 39,8 млн. сўм қарздорлиги йиғилиб қолган ва қарздорга нисбатан қидирув эълон қилинган.

Бошқарманинг қидирув шўъбаси ходимлари томонидан олиб борилган қидирув ҳаракатлари жараёнида қарздор Н.Ш. уйида яшириниб келаётганлиги аниқланган.

Олиб борилган қидирув тадбирлари давомида қарздор Н.Ш. топилиб, бўлим давлат ижрочиси томонидан унга нисбатан маъмурий баённома расмийлаштирилган ва тўпланган ҳужжатлар Ўзбекистон Республикаси МЖтКнинг 474-моддасига асосан Жиноят ишлари бўйича Урганч тумани судига юборилган.

Суднинг 07.10.2026 йилдаги қарори билан қарздор Н.Ш.га 15 (ўн беш) сутка маъмурий қамоқ жазоси қўлланилиб, жазо муқаррарлиги таъминланди.

Шоира Курамбаева,
Бюронинг Урганч тумани бўлими давлат ижрочиси

Бюро раҳбарияти Хоразмдаги мурожаатчи фуқароларни онлайн қабул қилди

Халқ манфаатини ўйлаш, унинг дарди билан яшаш мамлакат тараққиётини таъминлашнинг муҳим воситаси.

Мажбурий ижро бюроси директорининг 1-ўринбосари Ш.Б.Хайдаров томонидан Хоразм вилоятида яшовчи жисмоний ва юридик шахслар вакиллари учун видеоконференция алоқа воситаси орқали онлайн қабул ўтказилди.

Бюронинг Хоразм вилояти бошқармасида ташкил этилган онлайн қабулга ташриф буюрган мурожаатчилар ўзларининг қийнаб келаётган муаммоли ва долзарб масалалар бўйича иштирок этдилар.

Қабул давомида жами 18 нафар фуқароларнинг алимент, қарз ундириш, тақиқни ечиш ва бошқа масалаларга оид мурожаатлари тингланди. Шундан, 5 та мурожаат жойида ижобий ҳал қилинган бўлса, 2 таси бўйича тушунтириш берилди, 11 та мурожаатни ҳал этиш қўшимча муддат талаб этганлиги сабабли, алоҳида назоратга олиниб, ижроси бўйича бошқарма масъулларига аниқ вазифалар топширилди.

Бюро органлари томонидан кўриб чиқилиб, ҳал этилаётган муаммолар фуқароларнинг Бюрога бўлган ишончини янада мустаҳкамлашга хизмат қилади.

Байрам арафасида фахрийлар ҳолидан хабар олинди

Мустақиллигимизнинг 35 йиллиги муносабати билан Мажбурий ижро бюроси Хоразм вилояти бошқармасида узоқ йиллар самарали меҳнат қилган, ҳозирда прокуратура органлари фахрийлари сафидан жой олган устозларга ҳурмат-иззат кўрсатилиб, уларнинг ҳолидан хабар олинди.

Уларга махсус пенсионерлик гувоҳномалари тантанали равишда топширилиб, эсдалик совғалари ҳам тақдим этилди.

Фахрийлар хонадонларига ташриф буюрган шогирдлар устозлар билан самимий суҳбат қуриб, уларнинг қонун устуворлигини таъминлаш йўлидаги ибратли меҳнати ва бой тажрибаси бугунги кундаги фаолиятлари учун мустаҳкам мактаб эканини таъкидлашди.

Меҳнат фахрийлари ҳам кўрсатилаётган эътибор ва ғамхўрлик учун Президентимизга,
Бош прокурорга ҳамда Бюро раҳбариятига миннатдорчилик билдириб, ўзларининг самимий дуо ва эзгу тилакларини изҳор этдилар.

Мажбурий ижро бюроси Хоразм вилояти бошқармаси томонидан бундай хайрли тадбирлар келгусида ҳам изчил давом эттирилиши, фахрий ходимларнинг меҳнатини қадрлаш,
улар билан доимий алоқада бўлиш ҳамда ёш авлодга уларнинг бой ҳаётий ва касбий тажрибасини етказишда муҳим аҳамият касб этади.