Гулистондаги чайхонада содир бўлган одамлар ўлимига олиб келган портлаш иши бўйича суд ҳукми чиқарилди
Ўзбекистон, Тошкент — АН
Podrobno.uz. Гулистон шаҳрида 2025 йил 2 декабрь куни «Бек» чайхонасида газ баллони портлаши билан боғлиқ иш бўйича олти нафар судланувчига нисбатан ҳукм чиқарилди. Фожиа оқибатида олти нафар ошпаз ҳалок бўлган, яна ўнлаб одамлар жароҳат олган. Суд аниқлашича, ошхонада йиллар давомида техник кўрикдан ўтказилмаган газ баллонларидан фойдаланилган.
Иш материалларига кўра, портлашга 2010 йилда ишлаб чиқарилган баллондан газ сизиб чиқиши сабаб бўлган. Баллон ошхона қозони горелкасидан чиққан юқори ҳарорат таъсирида ёрилган. У 2015 йилдан бери техник кўрикдан ўтказилмаган.
Ошхонада 2000, 2013 ва 2018 йилларда ишлаб чиқарилган, ўз вақтида техник текширувдан ўтказилмаган бошқа баллонлардан ҳам фойдаланилган.
Фожиадан бир кун олдин ошхона ходимлари тўртта баллонни Мирзаобод туманидаги автомобилларга газ қуйиш шохобчасига олиб боришган. Шохобча маиший газ баллонларини суюлтирилган газ билан тўлдириш учун зарур лицензияга эга бўлмаганига қарамай, баллонлар тўлдириб берилган. 2 декабрь куни эрталаб ходимлар баллонларни ошхона плиталари ва қозонларига улашган. Соат 10:50 да улардан бири портлаган.
Муассаса раҳбари қоидабузарликлардан хабари бўлмаганини билдирган, бироқ судда айбини қисман тан олган. Унинг айтишича, газ босими пастлиги сабабли 2025 йил октябрь ойидан бошлаб ошхонада пропан баллонларидан фойдаланилган. Раҳбар меъёрий ҳужжатлар талабларини тўлиқ ўрганмасдан баллонлардан фойдаланишга рухсат берганини айтган.
Шунингдек, у муассаса жабрланганларга ва ҳалок бўлганларнинг оилаларига моддий ёрдам кўрсатганини, марҳумларнинг яқинларидан кечирим сўраганини билдирган. Раҳбар қарамоғида тўрт нафар фарзанди борлигини, улардан бири ногиронлиги бўлган бола эканини инобатга олишни сўраган.
Жиноят ишлари бўйича Оқолтин туман суди ҳукмни 2026 йил 21 сентябрь куни чиқарган. Уч нафар судланувчи оғир оқибатларга олиб келган меҳнатни муҳофаза қилиш ва ёнғин хавфсизлиги қоидаларини бузишда, яна уч нафари эса меҳнатни муҳофаза қилиш қоидаларини бузишда айбдор деб топилган.
Муассаса раҳбари 3 йил 6 ой муддатга озодликдан маҳрум қилинган. Шунингдек, унга 2 йил 6 ой давомида умумий овқатланиш корхоналарида моддий жавобгарлик билан боғлиқ лавозимларда ишлаш тақиқланган.
Яна икки нафар судланувчининг ҳар бири 3 йил 1 ой муддатга озодликдан маҳрум этилган. Уларга ҳам 1 йил 6 ой давомида умумий овқатланиш соҳасида ишлаш тақиқланган.
Қолган уч нафар судланувчига озодликни чеклаш жазоси тайинланган. Уларнинг бир нафари тўрт йил муддатга озодлиги чекланиши билан бирга, икки йил давомида ёқилғи қуйиш соҳасида тадбиркорлик фаолияти билан шуғулланиш ҳуқуқидан маҳрум қилинган. Қолган икки нафарига эса 3 йил 6 ойдан озодликни чеклаш жазоси тайинланиб, икки йил давомида автомобилларга газ қуйиш шохобчаларида ишлаш тақиқланган.
«Bek family cafe» ва «Guliston GTSh» компанияларига тегишли умумий қиймати 8,7 миллиард сўм бўлган кўчмас мулк ва саккизта автомобильга қўйилган хатлов манфаатдор шахсларнинг даъволари кўриб чиқилгунига қадар ўз кучида қолдирилган.
Эслатиб ўтамиз, ҳодисадан кейинги дастлабки кунларда уч киши ҳалок бўлгани, яна 29 киши турли даражадаги куйиш жароҳатлари билан шифохонага ётқизилгани хабар қилинган эди. Кейинчалик қурбонлар сони олти нафарга етган.
2025 йил 4 декабрь куни Ўзбекистон Президенти Шавкат Мирзиёев Республика шошилинч тиббий ёрдам илмий марказининг Сирдарё вилояти филиалида даволанаётган жабрланганлар ҳолидан хабар олган ва ҳалок бўлганларнинг оилаларига ҳамдардлик билдирган.
