Yozuvchilar uyushmasi | Rasmiy

21-oktyabr – O‘zbek tili bayrami kuni

O‘ZBEK TILIM

Bobomning tilisan, momomning tili,
Otamning tilisan, onamning tili.

Osmonday bepoyon tug‘ilgan yering,
Hech kimga ma’lummas avval-oxiring.

Qadimiy ajdoding ul Abutturkdir,
O‘toving Osiyo — boshingda bo‘rkdir.

To‘maris shiddati, Shiroqning qoni,
Manguberdi o‘chi, Temurbek shoni.

Koshg‘ariy dilida o‘lmas bayotim,
Yassaviy tilida mangu hayotim.

Navoiy armoni, Bobur nidosi,
Farog‘iy o‘kinchi, Mashrab vidosi.

Chaqmoqlar chaqini, shamol shovuri,
Uchqur bedovlarning g‘ala-g‘ovuri.

Suvlar shildirashi, gullar salomi,
Xushovoz bulbulning tonggi kalomi.

O‘zbekona odob, hayo, andisha,
Tilim qat-qatida yashar hamisha.

Kindik qonim tomgan muqaddas yerim,
Cho‘lponu, Qodiriy, Usmon Nosirim.

Istibdod qo‘rg‘onin yanchib, yiqolding,
Olov-otashlardan omon chiqolding.

Sen ro‘yi zaminga o‘zbek tilida,
Salomlar yo‘llarsan o‘zbek elidan.

Teran ildizlardan olgan qudrat, kuch,
Bahaybat chinorsan novdalaring g‘uj.

Ming yillar o‘tsa ham navqiron, yoshsan,
Mudom boshimizda porloq quyoshsan.

O‘zimning tilimsan, bolamning tili,
O‘zbegim tilisan, olamning tili.

Abdumajid Azim she'ri

21-oktyabr – O‘zbek tili bayrami kuni

 ONA TILIM

Qadrim so‘raganda qayrog‘im, tilim,
Yorning ta’rifida qaymog‘im, tilim,
Yovning yuragiga titroqlar solgan,
Alpomish belida belbog‘im tilim.

Yassaviy baytida tumorim, tilim,
Navoiy nazmida sen orim, tilim,
Kumushning vasfida betakror malak,
Qodiriydan qolgan yodgorim, tilim.

Onam allasida bayotim manim,
Bolam og‘zidagi novvotim manim,
Oq-sariq ilonlar bo‘ynidan bo‘qqan,
Tanglayda tosh qotgan faryodim manim.

Toshlar to‘fonida bag‘ri tilimsan,
Ko‘ksin changallagan qonli qo‘limsan,
Oyga almashmasman, kunga bermasman,
Cho‘lpon yuragida ungan gulimsan.

Ko‘zlarning gavhari, ko‘ngil oynasi,
Izhor iffatidir yorning ginasi.
Mashrab qalamida devona tilim,
Tinglagan, entikkan ishq ashulasi.

Jismimda demangiz, jonimda tilim,
Yetmish ikki tomir-qonimda tilim,
O‘g‘limga ham mening jonimdan o‘tgan,
Qizimga qatralab qonimdan o‘tgan.

Qadrin so‘rasangiz qarog‘im tilim,
Ko‘ngil osmonida chaqmog‘im tilim,
Nonidek totli-yu, choyidek issiq,
O‘zbek ko‘ksidagi bulog‘im tilim.

Mahmud Toir

21-oktyabr – O‘zbek tili bayrami kuni

ONA TILIM

Ming yillarki, bulbul kalomi
O‘zgarmaydi, yaxlit hamisha.
Ammo sho‘rlik to‘tining holi
O‘zgalarga taqlid hamisha.

Ona tilim, sen borsan, shaksiz,
Bulbul kuyin she’rga solaman.
Sen yo‘qolgan kuning, shubhasiz,
Men ham to‘ti bo‘lib qolaman!

Abdulla  Oripov

OTA YURTIM

Ota yurtim, borliging — dilda bo‘ston borligi,
Aytsam, olam tinglagich noyob doston borligi.

Haq bergan hayotimga yarashiq qadriyatim,
Muarrih bobolarda rostgo‘y zabon borligi.

Sayru sayohat sabab olislamoq bag‘ringdan,
Ko‘ngil mehrobin olgan sog‘inchli on borligi.

Hurliging — buyuklig-u ulug‘likdir o‘zliging
Istarangda o‘zbekcha shuhratu shon borligi.

Alp o‘g‘lim, pari qizim, chorlasang safda hushyor,
Hushyorlik — himoyada tengsiz qalqon borligi.

Zamirangman — tabarruk naqldan shuur topgan,
Seni sevmoqlik — demak, jonda iymon borligi.

01.09.2026

Zamira Ro‘ziyeva,
O‘zbekiston Yozuvchilar uyushmasi aʼzosi

ESLASAK ARZIRLI XUSH DAMIMIZ BOR

26-aprel – Oʻzbekiston xalq shoiri Muhammad Yusuf tugʻilgan kun. Shoirning rafiqasi Nazira as-Salom bilan el suygan ijodkor haqida dildan suhbat qurdik. Sizga tanish va qadrli boʻlgan satrlarning yuzaga kelish tarixi, sabablari, shoir shaxsi, shirin xotiralar sizni qiziqtirishi aniq.

📱 To‘liq videoni YouTube sahifamizda tomosha qiling: https://youtu.be/FhQHVGiycBc

HAMDARDLIK

O‘zbekiston Yozuvchilar uyushmasi jamoasi uyushmaning xo‘jalik mudiri Abdurauf Eshimqulovga ukasi Nurbek Eshimqulovning vafoti munosabati bilan chuqur hamdardlik bildiradi.

O‘zbekiston Yozuvchilar uyushmasi Axborot xizmati

“SO‘ZMUNCHOQ” KITOBLARI TAQDIMOTI

   Bugun O‘zbekiston Milliy kutubxonasida “Kitobsevar millat” shiori ostida o‘tkazilayotgan VI kitobxonlik haftaligi doirasidagi O‘zbekiston Yozuvchilar uyushmasi hamda “Asakabank” tashabbusi bilan navbatdagi kitoblar taqdimoti bo‘lib o‘tdi.
   O‘zbekiston Yozuvchilar uyushmasi homiyligida “Adabiyot” nashriyotida “So‘zmunchoq” rukni otida chop etilgan kitoblar taqdimotida shoirlar, yozuvchilar, adabiyotshunoslar, yosh ijodkorlar, talabalar, ommaviy axborot vositalari vakillari qatnashdi.
   Taqdimotda O‘zbekiston Milliy kutubxonasi direktori o‘rinbosari Nasiba Xoldorova, O‘zbekiston Yozuvchilar uyushmasi raisi o‘rinbosari G‘ayrat Majid, filologiya fanlari doktori, professor Adhambek Alimbekov, filologiya fanlari bo‘yicha falsafa doktori Sitorabonu Shomurodova, “Adabiyot” nashriyoti direktori Nodir Suvonov kitobning mazmun-mohiyati haqida gapirdi.
   Nargiza Asadovaning “Qushlar salovati”, Bobur Elmurodovning “Tajohul ul-Orif”, Bahodir Bahromning “Gulimoh”, Ravshan Haqmurodning “Hadik”, Anvar Botirning “Uch”, Navoiylik Alisherning “Burch”, Iroda Umarovaning “Garashalik ko‘ngil”, Sayfiddin Okanovning “Toshloq ko‘chalar”, Yulduz O‘rmonovaning “Axtaram” kitoblari muxlislar eʼtiboriga tortiq qilindi.
   Taqdimotda mualliflar ham so‘zga chiqib, o‘z sheʼrlaridan o‘qidi, kitobning chiqishida bosh-qosh bo‘lgan Yozuvchilar uyushmasiga minnatdorlik bildirdi.
Taqdimot so‘ngida mualliflarga bankning esdalik sovg‘alari topshirildi.

O‘zbekiston Yozuvchilar uyushmasi Axborot xizmati