Ibrohim Abdujabborov | Shaxsiy blog

Sen ertaga uchishing kerak, lekin tadqiqot bilan bandsan…Chamadonni kim tayyorlaydi deydigan rasm😅

@ibrohim_sensei

Yana bir odamchani vatanimiz aholisi ro’yhatiga qo’shdik!

Bahtiyorova Soliha Ibrokhimjon kizi ( hali ota ekanimga moslasha olmayapman😆)

Ha aytgancha rasmda ham ma’no bor. Yaponiyadagi elchixonamizga borishda yo’lda katta daraxt bor. Kamida 100-150 yillik bo’lsa kerak. Qizim umri ham uzun va hayrli bo’lsin!

@ibrohim_sensei

Uzbek Academic Club

Yana bir ajoyib kun bo’ldi. Online darsda o’qitgan o’quvchilarimni bir nechtasini (rasmda 7 nafar) ko’rib gaplashish, hayotda ko’rishish nasib qildi.

Faxrlandim. Omadlarini bersin!

Qandaydir bu tadbir juda ham fayzli o’tdi.

@ibrohim_sensei

Nobel xabari kelganida u xarid qilib yurgan ekan…

Bugun, 7-oktabr kuni, 76 yoshli yapon olimi Kensou Soai fransuz olimi Henri Kagan bilan birga kimyo bo‘yicha Nobel mukofoti laureati deb e’lon qilindi. Soai bu xabarni kundalik xaridga chiqqan paytida eshitgan.

Uning ilk so‘zlaridan biri shunday bo‘ldi:
«Bu — hayotimdagi eng hayajonli kun».

Tokyo University of Science faxriy professori bo‘lgan Soai nimani kashf qilgan?

Sodda qilib aytganda, ayrim molekulalar o‘ng va chap qo‘limiz kabi bir-birining oynadagi aksiga o‘xshaydi. Soai esa juda kichik farqning reaksiya davomida kuchayib, bir shaklning deyarli to‘liq ustun bo‘lishiga olib kelishini ko‘rsatgan. Bu tirik tabiatdagi molekulalar nega muayyan shaklni «tanlaganini» tushunishga yordam beradi. Uning mashhur kashfiyoti 1995-yilda qilingan.

1995-yildagi kashfiyot. 2026-yildagi Nobel. Orada 31 yil.

Meni o‘ylantirgan jihati ham shu. Biz ba’zan qilayotgan ishimizning natijasini juda tez ko‘rishni xohlaymiz. Bir necha oy harakat qilib, sezilarli o‘zgarish bo‘lmasa, «bunga arziydimi?» deb qolamiz.

Bugun qilayotgan ishimiz qadrini bugunning o‘zida hamma tushunishi shart emas. Ayrim ishlarning ahamiyati yillar o‘tib yanada ravshanlashadi.

Har birimiz Nobel olmasligimiz mumkin. Lekin o‘rganayotgan tilimiz, yozayotgan tadqiqotimiz, ta’lim berayotgan o‘quvchimizga sarflagan vaqtimizning natijasi ham darrov ko‘rinavermaydi.

Hali natijasini ko‘rmayotganimiz — mehnatimiz behuda ketayotganini anglatmaydi.

@ibrohim_sensei

“Bir kilo xolos-ku”, deymiz-a…

Rasmdagi — tanadagi 1 kg yog‘ning maketi. Raqamda kichkinadek tuyuladi, ko‘z bilan ko‘rganda esa boshqacha ekan.

Yaponlarda shunaqa ko‘rgazmali tushuntirish bor: uzoq gapirish shart emas, bir qarashning o‘zi yetadi .

@ibrohim_sensei

Sovg‘a qutisidagi kichkina qog‘ozda birgina so‘z yozilgan: “Tinchlik”.

“Inson” nashriyotidan Kerri Dryurining “So‘nggi qog‘oz turna” kitobi sovg‘a bo‘lib kelibdi. Kitob yonidagi qog‘oz turna va shu bir og‘iz tilak sovg‘aga o‘zgacha ma’no beribdi.

Asar 1945-yilgi Hirosima fojiasidan omon qolgan insonning keyingi hayoti, bajarilmay qolgan va’da, ayriliq va o‘zini kechirishga bo‘lgan urinishi haqida ekan. Yaponiyada yashayotgan inson sifatida bu hikoya meni ayniqsa qiziqtirdi. Uni o‘zbek tilida o‘qishning ham o‘zgacha zavqi bo‘lsa kerak.

“Inson” nashriyoti jamoasiga meni eslab, shunday ma’noli sovg‘a yuborganlari uchun chin dildan rahmat! Kitobni ham, uning taqdimotini ham mehr bilan tayyorlaganingiz sezilib turibdi.

O‘qib bo‘lgach, taassurotlarimni sizlar bilan ham bo‘lishaman. Siz ham albatta olib o’qib ko’ring!

@ibrohim_sensei

Tokutei ginou 2ga o‘tish uchun 5 yil ishlash shartmi?

2025-yil oxiridagi ma’lumotlarga ko‘ra, Yaponiyadagi 7 362 nafar yurtdoshimizdan 100 nafari Tokutei ginou 1, atigi 2 nafari esa Tokutei ginou 2 maqomida bo‘lgan.

Birinchi toifadagi 5 yil — ikkinchi toifaga o‘tish uchun majburiy kutish muddati emas. Tegishli talablarni bajarsangiz, oldinroq ham o‘tishingiz mumkin.

Qanday talablar bor? Oilani olib kelish mumkinmi? 2027-yildagi yangi yapon tili talabi kimlarga tegishli?

Shu savollarni rasmiy manbalarga tayanib, sodda tilda tushuntirdim.

📄 Batafsil ilovadagi PDF maqolada o‘qing. Yaponiyada ishlayotgan tanishlaringizga ham ulashing!

@ibrohim_sensei

7 yil avvalgi hayajonni his qildi odam!

@ibrohim_sensei

Tadbridan lavha

@ibrohim_sensei

Ba’zi orzularning amalga oshishi uchun 8 yil kerak bo‘larkan…

8 yil avval shu notiqlik tanlovida bir kun men ham qatnashishni orzu qilgandim. Kecha esa Okayamada o‘sha sahnada turdim.

65-bor o‘tkazilgan ushbu tanlovda 10 ta davlatdan 12 kishi ishtirok etdi. Shuncha yillik tarixga ega tanlovda qatnashgan ikkinchi o‘zbek bo‘lishning o‘zi menga katta faxr berdi. Ismim yonida «O‘zbekiston» deb yozilganini ko‘rishning hissi boshqacha ekan.

Ochig‘i, bu safar o‘zimni ham yana bir bor kashf qildim. Tadqiqot, ish, kundalik tashvishlarga shunchalik berilib ketibmanki, miyamga ham biroz boshqa muhit, boshqa suhbatlar kerak bo‘lib qolgan ekan. Tayyorlanish, hayajon, sahnaga chiqish… Shularning orasida g‘alati bir yengillik ham his qildim.

Sovrin nasib qilmadi. Albatta, odamning ichida umid bo‘ladi. Lekin uyga olib qaytayotgan taassurotlarim juda ko‘p.

54 yoshli xitoylik ishtirokchi ayolning sahnaga chiqishga bo‘lgan jasorati meni qoyil qoldirdi. AQShdan kelgan, Prinston universiteti doktoranti Davidning Yaponiyani qanchalik chuqur bilishi esa o‘zimga ham ko‘p savollar berishga undadi. Boshqalarning nutqini tinglab, ularning ko‘zi bilan qarab, Yaponiyani yana biroz yaxshiroq anglagandek bo‘ldim.

O‘qituvchi sifatida ham ko‘p narsa oldim. Kelajakda o‘quvchilarimni notiqlik tanlovlariga tayyorlashda, ularga yo‘l-yo‘riq ko‘rsatishda va o‘zimiz shunday tanlovlar o‘tkazishda bu tajriba juda asqatishiga ishonaman. Sahnaga chiqayotgan odamning ichidan nimalar o‘tishini yana bir bor o‘zim his qildim.

Menga ishongan, dalda bergan, xabar yozgan, yaxshi tilak bildirgan barchaga chin yurakdan rahmat. Qo‘llab-quvvatlashingizni his qilib turdim.

Nutqim va sahnadagi chiqishim YouTube’ga joylansa, albatta ulashaman. O‘zingiz ko‘rib, o‘zingiz baho berasiz.

Tanlov 6-dekabr kuni soat 14:30 dan, Yaponiya vaqti bilan NHK’da namoyish etiladi.

Kecha o‘sha sahnada O‘zbekiston nomidan turish men uchun juda qadrli bo‘ldi. Yaponiyadagi o‘zbeklarimizga ham ozgina bo‘lsa-da faxr hissini bera olgan bo‘lsam, bundan xursandman.

Sakkiz yil avval shu sahnani orzu qilgan o‘zimga esa bitta gap aytgim kelyapti: «Qara, nihoyat qatnashdik!»

@ibrohim_sensei

Taasurotlar bir olam ertaga batafsil yozaman!

@ibrohim_sensei

Notiqlik tanlovi

@ibrohim_sensei

Bir tizim ichida ishlayversangiz, yillar o’tgan sari odamda tajriba to’planib boraveradi ekan. Muammolarni ichidan ko’rib, ular ustida jamoa bilan ishlab asta-sekin yechim topiladi ekan. Bizda ham o’quvchilarni noldan yapon tiliga olib kirib olish, ularni…

Velesoped olib telegramga storyga joyladim.

Bir tanishim yozdi, mashina haydasang kerak deb o’ylagandim. Yo’q, velesoped oldik ham Xudoga shukur dedim.

Uyimdan universitetgacha piyoda 6 daqiqa, bekatga esa 3 daqiqa…

Supermarketga borgani 30 daqiqa yurishim kerak edi. Endi 10 daqiqa bo’ldi. Velesopedda og’ir narsa ham ko’tarishga hojat yo’q.

Mashinaga ehtiyoj yo’q…

Bir tizim ichida ishlayversangiz, yillar o’tgan sari odamda tajriba to’planib boraveradi ekan. Muammolarni ichidan ko’rib, ular ustida jamoa bilan ishlab asta-sekin yechim topiladi ekan.

Bizda ham o’quvchilarni noldan yapon tiliga olib kirib olish, ularni qiziqtirishda biroz muammo bor edi. Slayd qil, videolar ko’rsat bo’lib anchagina murakkab bo’lgan.

Nasib qilsa bunga ham yechim topdik. Birinchi marta JLPT Master imzosi ostida qo’llanma yozdik. Bunda yapon tiliga kirishda harflardan tortib, hafta kunlari, sonlar, davlat nomlari, oila va o’zini tanishtirishgacha joyladik. Bundan tashqari Yaponiya qanday davlat, nega yapon tili o’qish kerak, JLPT o’zi nima degan savolga ham javob berdik.

Nasib qilsa tez orada noldan boshlaydigan o’quvchilarimiz qo’liga ham yetib boradi.

Bundanda katta xabarlar tayyorlab qo’yganmiz. Hali hammasi oldinda…

https://t.me/jlpt_uzbekistan = BEST TEAM

Ikki kun avval yangi haydovchilik guvohnomamni qo‘limga oldim.

Rangi osmonrangda.
Lekin bugun shunchaki "prava" olmadim, balki 2 soatlik maxsus seminarda (koushu) qatnashib, chuqur mulohaza qildim.

Seminarda o‘tgan yili yuz bergan mudhish avtohalokatlar va o‘zgargan qoidalar haqida batafsil so‘zlab berishdi.

Meni hayratga solgan raqamlar: Yaponiyada odamlarning 99,2 foizi rulda xavfsizlik kamarini taqar ekan. Bu shunchaki qoida emas, balki hayotga bo‘lgan hurmat ekanini tushundim.

Lekin eng og‘ir qismi jazo choralari haqidagi ma’lumotlar bo‘ldi. Bir lahzalik e’tiborsizlik tufayli odam urib yuborilsa va jabrlanuvchi vafot etsa – haydovchi 7 yilgacha qamoq jazosiga mahkum etilishi yoki jabrlanuvchining oilasiga 100 million iyengacha (taxminan 660 ming dollar) tovon puli to‘lashiga to‘g‘ri kelishi mumkin ekan. Bu raqamlar ortida qancha buzilgan taqdirlar bor...

Ayniqsa 20 ta yapon va 1 ta chet ellik men qo’shganda 21 nafar talabaga shu mablag’ni kim to’lay oladi? Menda bunday pul yo’q degani bo’ldi.

Seminar oxirida bizga video qo‘yib berishdi. Unda avtohalokat sababli hayoti butunlay o‘zgarib ketgan insonlar, judolikka uchragan oilalar va ularning ko‘z yoshlari tasvirlangan. O'sha kadrlarni ko'rib, rulda o'tirgan har bir soniyamiz naqadar mas'uliyatli ekanini his qildim.

Do‘stlar, yo‘lda ehtiyot bo‘laylik.

Zeroki, 安全運転は経験ではなくて心です。Xavfsiz haydash – bu tajriba emas, balki qalbdagi mas’uliyatdir.